Live Updates

سوریا کمار یادو کی کپتانی خطرے میں، بھارتی بورڈ کا بڑے فیصلے پر غور

سوریا کمار یادو کے میچوں میں مسلسل سکور کرنے میں ناکام رہنے کے بعد بی سی سی آئی کے حکام تبدیلیوں پر غور کر رہے ہیں

ذیشان مہتاب جمعہ 8 مئی 2026 11:52

سوریا کمار یادو کی کپتانی خطرے میں، بھارتی بورڈ کا بڑے فیصلے پر غور

ممبئی (اردو پوائنٹ تازہ ترین اخبار ۔ 8 مئی 2026ء ) بھارتی کرکٹ بورڈ (بی سی سی آئی) ٹی ٹونٹی ٹیم کی قیادت میں تبدیلی پر غور کرنے لگا ہے اور رپورٹس کے مطابق شریاس آئر کو مستقبل کا نیا کپتان بنانے کی منصوبہ بندی کی جا رہی ہے۔

بھارتی میڈیا رپورٹس کے مطابق موجودہ ٹی ٹونٹی کپتان سوریا کمار یادو کی مسلسل خراب بیٹنگ فارم نے سلیکٹرز اور بورڈ حکام کو تشویش میں مبتلا کر دیا ہے، جس کے بعد شریاس آئر کو قیادت سونپنے پر غور کیا جا رہا ہے۔

رپورٹ کے مطابق سوریا کمار یادو کی کپتانی میں بھارت نے شاندار کامیابیاں حاصل کیں، جن میں ایشیا کپ 2025ء اور آئی سی سی ٹی ٹونٹی ورلڈ کپ 2026ء کا ٹائٹل بھی شامل ہے۔

وہ مہندر سنگھ دھونی اور روہت شرما کے بعد بھارت کو ٹی ٹونٹی ورلڈ کپ جتوانے والے تیسرے کپتان بنے تھے۔

(جاری ہے)

تاہم ان کی ذاتی بیٹنگ کارکردگی گزشتہ دو برسوں میں مسلسل تنزلی کا شکار رہی۔

سوریا کمار یادو نے 2024ء میں 429 رنز 26.81 کی اوسط سے بنائے جبکہ 2025ء میں 21 میچز میں صرف 218 رنز اسکور کر سکے، جہاں ان کی اوسط 13.62 اور اسٹرائیک ریٹ بھی 123.16 تک گر گیا۔

دوسری جانب شریاس آئر نے آئی پی ایل میں نہ صرف اپنی بیٹنگ بلکہ قائدانہ صلاحیتوں سے بھی متاثر کیا ہے۔

انہوں نے دہلی کیپیٹلز، کولکتہ نائٹ رائیڈرز اور پنجاب کنگز کو آئی پی ایل فائنل تک پہنچایا جبکہ 2024ء میں کولکتہ کو ٹائٹل بھی جتوایا۔

بھارتی رپورٹس میں کہا گیا ہے کہ آئی پی ایل کے اختتام کے بعد بھارت کو افغانستان، انگلینڈ، آئرلینڈ، ویسٹ انڈیز، سری لنکا اور زمبابوے کے خلاف مسلسل وائٹ بال سیریز کھیلنی ہیں، ایسے میں بی سی سی آئی جلد یا مرحلہ وار قیادت میں تبدیلی کا فیصلہ کر سکتا ہے۔