ہنٹا وائرس کے عام آبادی میں پھیلاؤ کا خطرہ انتہائی کم ہے، عالمی ادارۂ صحت

ہفتہ 9 مئی 2026 09:22

جنیوا (اُردو پوائنٹ اخبارتازہ ترین - اے پی پی۔ 09 مئی2026ء) عالمی ادارۂ صحت (ڈبلیو ایچ او) نے کہا ہے کہ ہنٹا وائرس کے عام آبادی میں وسیع پیمانے پر پھیلنے کا خطرہ “انتہائی کم” ہے اور موجودہ صورتحال کو کووڈ 19جیسی وبا سے تشبیہ نہیں دی جا سکتی۔شنہوا کے مطابق ڈبلیو ایچ او کے ترجمان کرسچن لنڈمائر نے جنیوا میں بریفنگ کے دوران کہا کہ “یہ کورونا وائرس نہیں ہے” اور اس کے پھیلاؤ کی نوعیت کووڈ ۔

19سے بالکل مختلف ہے۔

(جاری ہے)

انہوں نے بتایا کہ بحرِ اوقیانوس میں موجود کروز شپ “ایم وی ہونڈیئس” پر وائرس کے پھیلاؤ کے بعد عالمی ادارۂ صحت مختلف ممالک کے ساتھ مل کر صورتحال کی نگرانی اور ردعمل کو مربوط بنا رہا ہے۔ترجمان کے مطابق بعض کیسز میں ایک ہی کیبن میں رہنے والے افراد بھی بیک وقت متاثر نہیں ہوئے، جس سے ظاہر ہوتا ہے کہ وائرس انسان سے انسان میں کووڈ ۔19کی طرح تیزی سے منتقل نہیں ہو رہا۔رپورٹس کے مطابق کروز شپ پر اب تک تین افراد ہلاک جبکہ متعدد دیگر بیمار ہو چکے ہیں، جس کے بعد یورپ، افریقہ اور لاطینی امریکہ کے ممالک پر مشتمل بین الاقوامی سطح پر صحتِ عامہ کا ہنگامی ردعمل شروع کیا گیا ہے۔