اسرائیل کی حزب اللہ کے 85 ٹھکانوں پر کارروائی کرنے کا دعوی

ہفتہ 9 مئی 2026 20:12

تل ابیب/بیروت (اُردو پوائنٹ اخبارتازہ ترین - این این آئی۔ 09 مئی2026ء) جنوبی لبنان میں ہونے والی وسیع فضائی کارروائیوں کے بعد اسرائیلی فوج نے اعلان کیا ہے کہ گزشتہ 24 گھنٹوں کے دوران اس نے حزب اللہ کے 85 سے زائد ٹھکانوں کو نشانہ بنایا ہے۔

(جاری ہے)

اسرائیلی فوج کے ترجمان افیخائی ادرعی نے ایک بیان میں کہا کہ اسرائیلی افواج نے مختلف علاقوں میں حزب اللہ کے 85 سے زائد بنیادی ڈھانچوں پر حملے کیے، جن میں اسلحہ کے ذخیرے، میزائل داغنے کے پلیٹ فارم اور فوجی مقاصد کے لیے استعمال ہونے والی عمارتیں شامل ہیں۔

انہوں نے مزید کہا کہ حزب اللہ کے ارکان ان مقامات کو اسرائیلی فوج اور اسرائیل کے خلاف مبینہ دہشت گرد منصوبوں کی تیاری کے لیے استعمال کر رہے تھے۔ترجمان کے مطابق فوج نے مشرقی لبنان کے علاقے بقاع میں ایک سرنگ کو بھی نشانہ بنایا، جسے حزب اللہ مبینہ طور پر اسرائیلی فوج کے خلاف استعمال ہونے والے جنگی سازوسامان کی تیاری کے لیے استعمال کر رہا تھا۔