نائب وزیرِاعظم کا علاقائی روابط کے فروغ، اقتصادی شراکت داریوں کے دائرہ کار میں توسیع، اور پیشہ ورانہ اداروں کے درمیان تعاون کو مضبوط بنانے کی اہمیت پر زور

ہفتہ 9 مئی 2026 20:11

اسلام آباد (اُردو پوائنٹ اخبارتازہ ترین - اے پی پی۔ 09 مئی2026ء) نائب وزیرِاعظم / وزیرِخارجہ سینٹر محمد اسحاق ڈار نے علاقائی روابط کے فروغ، اقتصادی شراکت داریوں کے دائرہ کار میں توسیع، اور پیشہ ورانہ اداروں کے درمیان تعاون کو مضبوط بنانے کی اہمیت پر زور دیتے ہوئے کہا کہ ان اقدامات سے خطے کی بھرپور صلاحیتوں کو بروئے کار لایا جا سکتا ہے۔ان خیالات کا اظہار انہوں نے ساؤتھ ایشیا فیڈریشن آف اکاؤنٹنٹس (سافا) کانفرنس کے موقع پر ایک اجلاس سے خطاب کرتے ہوئے کیا۔

انہوں نے خطے میں استحکام، ہم آہنگی اور پائیدار ترقی کے فروغ میں پاکستان کے تعمیری کردار کو اجاگر کرتے ہوئے کہا کہ علاقائی اداروں کے درمیان زیادہ تعاون مشترکہ ترقی، جدت اور جنوبی ایشیا میں عوامی روابط کو مزید مضبوط بنانے کی راہ ہموار کر سکتا ہے۔

(جاری ہے)

انہوں نے علاقائی امن، اقتصادی تعاون اور جنوبی ایشیائی اداروں اور پیشہ اور افراد کے درمیان گہرے روابط کے فروغ کے لیے پاکستان کے عزم کا بھی اعادہ کیا تاکہ ایک زیادہ مربوط اور خوشحال خطے کی تشکیل ممکن بنائی جا سکے۔اجلاس میں سافا کے صدر ہمایوں کبیر نائب صدر پربھن جھا اشفاق ٹولا ، عظیم صدیقی ، این کے مبین، کوثر عالم ذیشان اعجاز ، تشن سبھاسنگھے ، اور جنوبی ایشیا کے پیشہ ورانہ اداروں کے دیگر عہدیداران شامل تھے۔