پنجاب حکومت کا مدارس کی رجسٹریشن کے طریقہ کار میں تبدیلی کا فیصلہ

وفاق المدارس میں رجسٹریشن اب پنجاب میں بھی قابلِ قبول ہوگی، وفاقی اور صوبائی ڈیٹا بیس کو آپس میں منسلک کیا جائے گا

ساجد علی پیر 11 مئی 2026 13:42

پنجاب حکومت کا مدارس کی رجسٹریشن کے طریقہ کار میں تبدیلی کا فیصلہ

لاہور (اُردو پوائنٹ اخبارتازہ ترین۔ 11 مئی2026ء) پنجاب حکومت نے مدارس کی رجسٹریشن کے نظام کو جدید، آسان اور مؤثر بنانے کے لیے مدارس رجسٹریشن ایکٹ میں ترامیم لانے کا فیصلہ کرلیا، اس اقدام کا بنیادی مقصد مدارس کے منتظمین کو اضافی کاغذی کارروائی اور دوہرے رجسٹریشن کے نظام سے نجات دلانا ہے۔ میڈیا رپورٹس کے مطابق حکومتی ذرائع کا کہنا ہے کہ سوسائٹیز رجسٹریشن ایکٹ میں اہم ترامیم تجویز کی گئی ہیں، جن کے تحت وفاق المدارس اور دیگر دینی تعلیمی بورڈز کے پاس پہلے سے رجسٹرڈ مدارس کو اب پنجاب میں الگ سے رجسٹریشن کرانے کی ضرورت نہیں ہوگی، جو مدرسہ وفاقی سطح پر رجسٹرڈ ہے، اسے پنجاب میں بھی قانونی طور پر رجسٹرڈ تصور کیا جائے گا، جس سے دوبارہ ویریفیکیشن اور اضافی مراحل کا بوجھ ختم ہو جائے گا۔

(جاری ہے)

بتایا گیا ہے کہ وفاقی اور صوبائی سطح پر مدارس کے ڈیٹا کو آپس میں منسلک کرنے کا منصوبہ تیار کیا گیا ہے تاکہ شفافیت اور نگرانی کا عمل خودکار ہو سکے، محکمہ داخلہ پنجاب کے حکام کا کہنا ہے کہ یہ ترامیم علما کرام اور مدارس کے منتظمین کے ساتھ تفصیلی مشاورت کے بعد تیار کی گئی ہیں تاکہ فریقین کے تحفظات کو دور کیا جا سکے، ان تجاویز کو حتمی منظوری کے لیے صوبائی کابینہ کو بھجوا دیا گیا ہے۔

بتایا جارہا ہے کہ محکمہ داخلہ بہت جلد پنجاب کابینہ کو ان ترامیم پر بریفنگ دے گا، جس کے بعد اس قانون کا باقاعدہ اطلاق کر دیا جائے گا، اس اقدام سے مدارس کو جہاں ایک طرف قانونی تحفظ ملے گا، وہیں دوسری طرف انتظامی امور میں آسانی پیدا ہوگی، مدارس کو بار بار مختلف دفاتر کے چکر کاٹنے اور پیچیدہ ویریفیکیشن کے عمل سے ریلیف ملے گا، جس سے حکومت اور دینی اداروں کے درمیان اعتماد کی فضا مزید بہتر ہوگی۔