ون کانسٹیٹیوشن ایونیو کی لیز منسوخی کا فیصلہ چیلنج، بینک آف پنجاب نے انٹرا کورٹ اپیل دائر کردی

اس منصوبے کی تعمیراتی کمپنی بی این پی کو تقریباً 2.5 ارب سے 3.5 ارب روپے کا قرض فراہم کر رکھا ہے، لیز کی منسوخی سے بینک کی اس خطیر رقم کی واپسی خطرے میں پڑ سکتی ہے؛ اپیل میں مؤقف

ساجد علی پیر 11 مئی 2026 15:16

ون کانسٹیٹیوشن ایونیو کی لیز منسوخی کا فیصلہ چیلنج، بینک آف پنجاب نے ..

اسلام آباد (اُردو پوائنٹ اخبارتازہ ترین۔ 11 مئی2026ء) بینک آف پنجاب نے 'ون کانسٹیٹیوشن ایونیو' کی لیز منسوخی سے متعلق اسلام آباد ہائیکورٹ کے چیف جسٹس سرفراز ڈوگر کے فیصلے کو چیلنج کرتے ہوئے انٹرا کورٹ اپیل دائر کردی۔ اطلاعات کے مطابق بینک آف پنجاب نے اسلام آباد ہائیکورٹ کے جسٹس ڈوگر کے اس فیصلے کے خلاف انٹرا کورٹ اپیل دائر کی ہے جس میں 'ون کانسٹیٹیوشن ایونیو' کی لیز منسوخ کرنے کا حکم دیا گیا تھا، بینک نے اس منصوبے میں اپنے بھاری مالی مفادات کا تحفظ یقینی بنانے کے لیے عدالت سے رجوع کیا ہے۔

بینک آف پنجاب کی جانب سے دائر اپیل میں یہ مؤقف اپنایا گیا ہے کہ بینک نے اس منصوبے کی تعمیراتی کمپنی بی این پی کو تقریباً 2.5 ارب سے 3.5 ارب روپے کا قرض فراہم کر رکھا ہے، لیز کی منسوخی سے بینک کی اس خطیر رقم کی واپسی خطرے میں پڑ سکتی ہے، جو کہ عوامی پیسے کا نقصان ہے۔

(جاری ہے)

معلوم ہوا ہے کہ بینک کی جانب سے دائر کی گئی اس انٹرا کورٹ اپیل پر ہائیکورٹ کے رجسٹرار آفس نے کچھ قانونی اعتراضات بھی عائد کیے ہیں، تاہم بینک کی قانونی ٹیم ان اعتراضات کو دور کرکے کیس کی جلد سماعت کے لیے کوشاں ہے۔

خیال رہے کہ ون کانسٹیٹیوشن ایونیو اسلام آباد کا ایک ہائی پروفائل منصوبہ ہے جو طویل عرصے سے قانونی تنازعات کا شکار ہے، جسٹس ڈوگر کے حالیہ فیصلے میں لیز منسوخ کرنے کا حکم دیا گیا تھا، جس سے نا صرف کمپنی بلکہ اس میں سرمایہ کاری کرنے والے بینکوں اور اپارٹمنٹ مالکان کے مفادات بھی متاثر ہوئے ہیں۔