عالمی مارکیٹ میں تیل کی قیمتوں کو پھر سے پر لگ گئے

مارکیٹ میں برطانوی خام تیل کی فی بیرل قیمت 107 ڈالرز سے تجاوز کر گئی، امریکی خام تیل کی قیمت بھی 101 ڈالرز کی سطح سے اوپر چلی گئی

محمد علی منگل 12 مئی 2026 19:17

اسلام آباد (اُردو پوائنٹ اخبارتازہ ترین۔ 12 مئی2026ء) عالمی مارکیٹ میں تیل کی قیمتوں کو پھر سے پر لگ گئے، مارکیٹ میں برطانوی خام تیل کی فی بیرل قیمت 107 ڈالرز سے تجاوز کر گئی، امریکی خام تیل کی قیمت بھی 101 ڈالرز کی سطح سے اوپر چلی گئی۔ تفصیلات کے مطابق بین الاقوامی منڈیوں میں منگل کوخام تیل کی قیمتوں میں تیزی کا رحجان برقرار رہا۔ امریکی ویسٹ ٹیکساس انٹرمیڈیٹ کے تحت خام تیل کے مستقبل کے سودے101.5ڈالرفی بیرل اوربرینٹ نارتھ سی کے مستقبل کے سودے 107.80ڈالرفی بیرل میں طے پائے، روسی یورال آئل کے تحت خام تیل کے مستقبل کے سودے 3.01ڈالرکے اضافہ سے 95.57ڈالرمیں طے پائے۔

جبکہ مشرق وسطیٰ کی مارکیٹوں میں ملاجلارحجان دیکھنے میں آیا،عرب لائیٹ کے تحت خام تیل کی قیمت میں 5.70ڈالرکااضافہ ہوااورمستقبل کے سودے 113.17ڈالرجبکہ کویت ایکسپورٹ بلینڈ کے تحت مستقبل کے سودے 3.83ڈالرکے اضافہ کے بعد118.06ڈالرمیں طے ہوئے، دبئی بینچ مارک کے تحت خام تیل کے مستقبل کے سودے 0.02ڈالرکی کمی کے بعد97.59ڈالرمیں طے پائے۔

(جاری ہے)

سونے کی قیمت میں 21.16ڈالرکی کمی دیکھنے میں آئی اورمستقبل کے سودے 4713.92ڈالرمیں طے پائے،گندم اورسویابین کی قیمتوں میں عمومی اضافہ کارحجان رہا،گندم کی قیمت میں 7.67ڈالرفی بشل اورسویابین کی قیمت میں 1.47ڈالرکااضافہ ہوا۔