ہنٹا وائرس: متاثرہ کروز شپ میں نو مریضوں کی تصدیق

یو این منگل 12 مئی 2026 21:45

اسلام آباد (اُردو پوائنٹ ۔ UN اردو۔ 12 مئی 2026ء) عالمی ادارہ صحت (ڈبلیو ایچ او)نے بتایا ہے کہ بحر اوقیانوس میں سفر کرنے والے مسافر بردار جہاز پر ہنٹا وائرس سے متاثرہ افراد کی تعداد بڑھ کر نو ہو گئی ہے۔ ان میں تین افراد کی ہلاکت ہو چکی ہے جبکہ مجموعی طور پر سات لوگوں کے جسم میں وائرس پایا گیا ہے۔

ادارے کے مطابق نیدرلینڈز کے پرچم بردار بحری جہاز ہونڈس کے آخری مسافروں کو آج جہاز سے اتار لیا جائے گا جو اس وقت جزائر کینیری کے شہر ٹینیریفے کی تجارتی بندرگاہ پر لنگر انداز ہے۔

ان مسافروں کو خصوصی پروازوں کے ذریعے جزیرے سے ان کے ممالک میں بھیجا جا رہا ہے۔ عملے کے 30 سے زیادہ ارکان بدستور جہاز پر موجود رہیں گے جسے نیدرلینڈز کی بندرگاہ روٹرڈیم پر لے جایا جائے گا۔

(جاری ہے)

گزشتہ ہفتے کے اختتام پر اقوام متحدہ کے سیکرٹری جنرل انتونیو گوتیرش نے ہنٹا وائرس کے پھیلاؤ سے نمٹنے کے لیے 'ڈبلیو ایچ او' کے ساتھ سپین اور دیگر ممالک کی حکومتوں تعاون کو سراہا تھا۔

احتیاط کی ضرورت

اگرچہ اس بیماری سے صحت عامہ کو لاحق خطرہ اب بھی کم ہے تاہم سیکرٹری جنرل نے زور دیا ہے کہ عالمی سطح پر صحت سے متعلق اقدامات کے ذریعے تمام افراد، خصوصاً جہاز کے مسافروں اور عملے کی حفاظت یقینی بنائی جائے۔

'ڈبلیو ایچ او' کی آٹھ رکنی ٹیم اس وقت ٹینیریفے میں موجود ہے جہاں وہ سپین کے حکام اور متعلقہ اداروں کے ساتھ مل کر صورتحال سے نمٹنے کے لیے اقدامات کر رہی ہے۔