مہاجر اتحاد نیشنل موومنٹ کی افواجِ پاکستان سے اظہار یکجہتی

فیلڈ مارشل عاصم منیر ملک کی سلامتی کے ضامن، قوم متحد اور دشمن کے پروپیگنڈے کو ناکام بنایا جائے گا،ڈاکٹر محمدانور

جمعرات 14 مئی 2026 22:26

کراچی(اُردو پوائنٹ اخبارتازہ ترین - این این آئی۔ 14 مئی2026ء) مہاجر اتحاد نیشنل موومنٹ کے چیئرمین ڈاکٹر محمد انور نے کہا ہے کہ فیلڈ مارشل سید عاصم منیر ملک کی سلامتی اور دفاع کے ضامن ہیں جبکہ افواجِ پاکستان قوم کا فخر ہیں۔اپنے بیان میں انہوں نے کہا کہ پاکستانی قوم ایک متحد اور محب وطن قوم ہے اور بھارت کو یہ بات سمجھنی چاہیے کہ پاکستان اپنی خودمختاری اور سلامتی پر کوئی سمجھوتہ نہیں کرے گا۔

کراچی ملک کا معاشی مرکز ہے اور یہاں تمام محب وطن پاکستانی آباد ہیں۔ڈاکٹر محمد انور نے کہا کہ افواجِ پاکستان نے ہر مشکل وقت میں ملک کا دفاع کیا ہے اور پوری قوم اپنی مسلح افواج کے ساتھ شانہ بشانہ کھڑی ہے۔ انہوں نے کہا کہ قومی سلامتی کے معاملے پر کسی قسم کی نرمی یا کمزوری برداشت نہیں کی جا سکتی۔

(جاری ہے)

انہوں نے کہا کہ مہاجر قوم ہر اول دستے کے طور پر پاکستان کی ترقی، استحکام اور دفاع میں ہمیشہ اپنا کردار ادا کرتی رہی ہے اور آئندہ بھی قومی یکجہتی کے ساتھ ملک کے استحکام کے لیے کام کرتی رہے گی۔

چیئرمین مہاجر اتحاد نیشنل موومنٹ نے مزید کہا کہ ملک دشمن عناصر کی کسی بھی منفی سوچ یا پروپیگنڈے کو قومی اتحاد کے ذریعے ناکام بنایا جائے گا۔آخر میں انہوں نے اس عزم کا اظہار کیا کہ پاکستان کی سلامتی، وحدت اور استحکام کے لیے تمام طبقات کو متحد ہو کر کردار ادا کرنا ہوگا اور افواجِ پاکستان کے ساتھ مکمل یکجہتی برقرار رکھی جائے گی۔