بلاول بھٹو زرداری کی گورنر پنجاب کے ہمراہ وٹو ہاؤس آمد،میاں منظور وٹو کے انتقال پر ان کی اہلیہ اور بیٹوں سے اظہار تعزیت کیا

بدھ 20 مئی 2026 00:27

لاہور (اُردو پوائنٹ اخبارتازہ ترین - اے پی پی۔ 20 مئی2026ء) پاکستان پیپلزپارٹی کے چیئرمین بلاول بھٹو زرداری نے صوبائی دارالحکومت میں مصروف دن گزارا۔وہ گورنر پنجاب سردار سلیم حیدر کے ہمراہ ماڈل ٹاؤن میں وٹو ہاؤس پہنچے اور پنجاب کے سابق وزیراعلی میاں منظور وٹو کے انتقال پر ان کی بیوہ پروین بیگم سے تعزیت کی،چیئرمین بلاول بھٹو زرداری نے میاں منظور وٹو کے انتقال پر ان کے صاحبزادوں معظم جہانزیب وٹو، میاں خرم جہانگیر وٹو اور میاں ذیشان منظور وٹو سے اظہار افسوس کیا۔

انہوں نے پنجاب اسمبلی کے سابق سپیکر میاں منظور وٹو کے انتقال پر ان کی صاحبزادیوں روبینہ شاہین وٹو، جہاں آرا وٹو، آمنہ قصوری، تبانہ شہزاد علی اور عائشہ منظور وٹو سے بھی رنج و غم کا اظہار کیا اورمیاں منظور وٹو کے بلندی درجات کے لئے فاتحہ خوانی اور لواحقین کیلئے صبر جمیل کی دعا کی۔

(جاری ہے)

اس موقع پر پی پی پی وسطی پنجاب کے سیکرٹری اطلاعات شہزاد سعید چیمہ اور پی پی پی لاہور کے صدر فیصل میر نے بھی سوگواران سے تعزیت کی۔

بعد ازاں پاکستان پیپلزپارٹی کے چیئرمین بلاول بھٹو زرداری معروف سماجی و کاروباری شخصیت نواب شہزاد علی خان سے ان کی رہائش گاہ پر ملاقات کی۔ اس موقع پر انہوں نے نواب شہزاد علی خان کو ان کی صاحبزادی کی منگنی پرمبارک دی۔اسکے بعد وہ رکن قومی اسمبلی اور پی پی پی شعبہ خواتین وسطی پنجاب کی صدر ثمینہ خالد گھرکی سے ملاقات کیلئے ان کی رہائش گاہ پر گئے اور سیاسی صورت حال پر تبادلہ خیال ہوا۔اس موقع پر پیپلز پارٹی کے پنجاب اسمبلی میں پارلیمانی لیڈر علی حیدر گیلانی اور پی پی لاہور کے رہنما ءاشرف خان بھی موجود تھے۔