Live Updates

وقت آگیا ہے معاہدہ کر لیں، 47 سال پرانا ایرانی رویہ مزید برداشت نہیں ہوگا، ٹرمپ

ایران پر حملہ نہ کرتے تو وہ 2 ہفتے میں ایٹم بم بنا لیتا، دشمن اور دنیا کو الجھن میں رکھنا میری حکمتِ عملی کا حصہ ہے، ممکن ہے ایرانی سپریم لیڈر سے کبھی ملاقات کروں؛ امریکی صدر کا انٹرویو

ساجد علی بدھ 3 جون 2026 16:43

وقت آگیا ہے معاہدہ کر لیں، 47 سال پرانا ایرانی رویہ مزید برداشت نہیں ..

واشنگٹن (اُردو پوائنٹ اخبارتازہ ترین۔ 03 جون2026ء) امریکی صدر ڈونلڈ ٹرمپ نے ایران کے ساتھ جاری حالیہ فوجی تنازعہ کے تناظر میں اپنی غیر متوقع حکمتِ عملی پر ہونے والی شدید تنقید کو یکسر مسترد کر دیا، انہوں نے واضح کیا ہے کہ زمینی حقائق تبدیل ہونے کے ساتھ ہی ان کے فیصلوں اور مؤقف میں بھی تبدیلی آ جاتی ہے۔ 'پوڈ فورس ون' (Pod Force One) نامی پوڈ کاسٹ کو دیئے گئے انٹرویو میں صدر ڈونلڈ ٹرمپ نے ایران کے خلاف جنگ اور اپنی بدلتی ہوئی پالیسیوں کا کھل کر دفاع کیا، ان کا ماننا ہے کہ دشمن کو اندھیرے اور الجھن میں رکھنا ان کے اپنے فائدے میں ہے، اگر وہ تنقید کرنے والے لوگ الجھن کا شکار ہیں، اور ایرانی بھی کنفیوز ہیں، تو یہ ایک اچھی بات ہے، یہ بس میری جبلت اور میرا طریقہ کار ہے، میری پوزیشنز تبدیل ہوتی رہتی ہیں۔

(جاری ہے)

ان کا کہنا تھا کہ ایسا ممکن ہے میں ابھی یہاں سے جاؤں، آپ کو کوئی جواب دوں، اور پھر 20 منٹ بعد جب اوول آفس پہنچوں تو مجھے اندازہ ہو کہ میرا دیا گیا جواب اب غلط ہو چکا ہے، کیوں کہ حالات اور حقائق بہت تیزی سے بدلتے ہیں اور وہ انہی کے مطابق ہم فیصلے کرتے ہیں، اسی طرح ایران پر کیے گئے حملے ایک ناگزیر اور سوچا سمجھا انتخاب تھا، جسے ہم مزید مؤخر نہیں کر سکتے تھے۔

ٹرمپ نے دعویٰ کیا کہ اگر میں یہ قدم نہ اٹھاتا تو ایرانی جوہری ہتھیار بنا لیتے، امریکی بی 2 بمبار طیاروں کے حملے کے محض دو ہفتے بعد ہی ان کے پاس نیوکلیئر ویپن ہوتا، اس لیے یہ قدم اٹھانا بہت ضروری تھا، اب ایران کبھی بھی جوہری ہتھیار حاصل نہیں کرسکے گا اور اس کے نتیجے میں کئی دیگر اچھے کام ہوں گے، ایران کو یہ واضح پیغام دے دیا گیا ہے کہ اب وقت آ چکا ہے دونوں ممالک کسی نہ کسی شکل میں ایک حتمی معاہدے تک پہنچ جائیں۔

امریکی صدر کا یہ بھی کہنا ہے کہ ایران گزشتہ 47 برس سے جس مخصوص طرزِ عمل پر چل رہا ہے، اسے اب مزید اس رویے کو جاری رکھنے کی اجازت ہرگز نہیں دی جا سکتی، اسی وجہ سے ایران اب جوہری ہتھیار نہ رکھنے پر آمادہ ہے، یہ ممکن ہے کہ میں مستقبل میں کبھی ایرانی سپریم لیڈر سے براہِ راست ملاقات بھی کروں۔