نرسنگ کونسل نے 55کالجز کی رجسٹریشن کی منظوری دے دی

اسلام آباد(اُردو پوائنٹ اخبارتازہ ترین - این این آئی۔ 08 جون2026ء) پاکستان نرسنگ اینڈ مڈوائفری کونسل نے تشکیل نو کے بعد 55کالجز کی رجسٹریشن کی منظوری دے دی، کروڑوں روپے جرمانہ کے عوض 4غیر رجسٹرڈ کالجز کو طلبا کے بہتر مستقبل کی خاطر چار سال بعد رجسٹریشن دی گئی ہے۔پاکستان نرسنگ کونسل اینڈ مڈوائفری کونسل ہیڈ آفس میں پریس کانفرنس کے دوران وفاقی وزیر مصطفی کمال کا کہنا تھا کہ نرسنگ کونسل کی کہانیاں نہ ختم ہونے والی ہیں پوری رات بات کروں تو بھی ختم نہیں ہوگی، نرسنگ کونسل کے شعبے کی زبوں حالی میں انڈیا کی کوئی سازش نہیں، بلکہ ہماری اپنی کارکردگی کا فقدان ہے۔

مصطفی کمال نے کہا کہ اعداد و شمار چیخ چیخ کر صورتحال بتا رہے ہیں پاکستان میں 9 لاکھ نرسز کی ضرورت ہے جبکہ موجودہ تعداد صرف 6 ہزار ہے، پڑوسی ملک میں 6 لاکھ نرسز کام کر رہی ہیں دنیا بھر میں 25 لاکھ نرسز کی کمی ہے۔

(جاری ہے)

مصطفی کمال نے کہا کہ سابق صدر کی ڈگری جعلی نکلی، الیکشن بھی جعلی تھا ڈپٹی رجسٹرار کے ساتھ مل کر یہ ایک مافیا بن چکا تھا کروڑوں روپے کی ڈیمانڈکی جا رہی تھیں، نام لے کر پیسے مانگے جاتے تھے۔

عدالت کے احکامات کے باوجود چارج نہیں لینے دیا گیا۔وفاقی وزیر نے کہا کہ کرپشن کروانی ہوتی تو پرانے والوں سے دوستی کیوں نہ کرتا وہ تو پیسے بنانے کی مشین تھے۔ چیلنج ہے ثبوت لاو، ایک چائے کی پیالی کی رسید دکھاو، میں تادیبی کارروائی نہ کروں تو میں مجرم ہوں۔انہوں نے کہا کہ اس مافیا کے خلاف ایکشن کے لیے حکومت نے آرڈیننس جاری کیا اب نرسنگ کونسل کا صدر گریڈ 22کا افسر ہوگا جواب دہ ہوگا، 19رکنی نئی کونسل تشکیل دے دی گئی ہے، اگر آرڈیننس لیپس بھی ہوجائے تو اس دوران ہونے والے فیصلوں کو سپریم کورٹ اور ہائیکورٹ کا تحفظ حاصل ہے۔

وفاقی وزیر نے کہا کہ مارچ 2025 کے بعد نرسنک کونسل میں ایک بھی کالج رجسٹرڈ نہیں ہوا۔ 425کالجز کی درخواستیں انسپیکشن کی منتظر ہیں۔ دو سال سے انسپیکشن سیل لفافوں میں بند تھی اور لاکھوں کی بارگین چل رہی تھی۔ نئی کونسل نے 63 میں سے 55کالجز کو ترجیحی بنیاد پر منظوری دے دی ہے۔مصطفی کمال کا وعدہ ہی: "ہم ایسا ڈیجیٹل نظام بنا کر جائیں گے کہ ابلیس بھی آ جائے تو شیطانی نہ کر سکے۔ انہوں نے والدین کو خبردار کیا کہ غیر رجسٹرڈ کالجز میں داخلہ نہ کروائیں، ورنہ آپ کے بچوں کا مستقبل داو پر لگ جائے گا۔وفاقی وزیر صحت مصطفی کمال نے کہاکہ سابق نرسنگ کونسل میں کرپشن کا بازار گرم تھا،دو سال سے انسپیکشن سیل لفافوں میں بند تھی اور لاکھوں کی بارگین چل رہی تھی۔