پاکستان اسٹاک ایکسچینج میں نوجوان سرمایہ کاروں کی دلچسپی بڑھ گئی‘رواں مالی سال میں 1.8 لاکھ نئے ریٹیل سرمایہ کار رجسٹرڈ

جمعرات 2 جولائی 2026 22:59

اسلام آباد (اُردو پوائنٹ اخبارتازہ ترین - آن لائن۔ 02 جولائی2026ء) پاکستان میں معاشی استحکام، حکومتی اصلاحات اور اسٹاک مارکیٹ کی بہتر کارکردگی کے باعث نوجوانوں کی سرمایہ کاری میں نمایاں اضافہ دیکھنے میں آ رہا ہے۔ پاکستان اسٹاک ایکسچینج میں نئے ریٹیل سرمایہ کاروں کی رجسٹریشن مسلسل بڑھ رہی ہے، جس سے ملک کی کیپیٹل مارکیٹ پر سرمایہ کاروں کے اعتماد میں اضافے کی نشاندہی ہوتی ہے۔

عرب نیوز کی رپورٹ کے مطابق رواں مالی سال کے دوران اگست سے مئی تک ایک لاکھ 80 ہزار 148** نئے ریٹیل سرمایہ کار پاکستان اسٹاک ایکسچینج میں رجسٹرڈ ہوئے۔رپورٹ کے مطابق 18 سے 30 سال کی عمر کے نوجوان نئی رجسٹریشنز کا 41 فیصد رہے، جن کی تعداد 74 ہزار 629 ریکارڈ کی گئی، جو نوجوان نسل کی سرمایہ کاری میں بڑھتی ہوئی دلچسپی کا واضح اظہار ہے۔

(جاری ہے)

اعداد و شمار کے مطابق پاکستان اسٹاک ایکسچینج میں ماہانہ اوسطاً 15 ہزار نئے سرمایہ کاری اکاؤنٹس کھل رہے ہیں، جن میں تقریباً 40 فیصد نوجوان سرمایہ کار شامل ہوتے ہیں۔

رپورٹ میں بتایا گیا ہے کہ گزشتہ تین برسوں کے دوران پاکستان اسٹاک مارکیٹ نے ڈالر کی بنیاد پر 66 فیصد سالانہ منافع فراہم کیا، جو خطے کی نمایاں مارکیٹوں میں سب سے زیادہ قرار دیا گیا ہے۔رپورٹ کے مطابق حکومت کی معاشی اصلاحات آئی ایم ایف پروگرام کے تحت مالی نظم و ضبط اور بہتر میکرو اکنامک اشاریوں نے سرمایہ کاروں کے اعتماد میں اضافہ کیا، جس کے نتیجے میں پاکستان اسٹاک ایکسچینج کی کارکردگی مزید مضبوط ہوئی ہے۔ماہرین کے مطابق نوجوان سرمایہ کاروں کی بڑھتی ہوئی شرکت، سرمایہ کاری کے رجحان میں تسلسل اور معاشی اشاریوں میں بہتری اس بات کی عکاسی کرتی ہے کہ پاکستان کی کیپیٹل مارکیٹ مستقبل میں مزید وسعت اور استحکام کی جانب گامزن ہے۔