کوہلو،لیفٹیننٹ جہانگیر مری شہید کی 17ویں برسی عقیدت و احترام سے منائی گئی

کوہلو (اُردو پوائنٹ اخبارتازہ ترین - اے پی پی۔ 12 جولائی2026ء) وطن عزیز پر اپنی جان نچھاور کرنے والے پاک فوج کے بہادر سپوت لیفٹیننٹ جہانگیر مری شہید کی 17ویں برسی نہایت عقیدت، احترام اور ملی جذبے کے ساتھ منائی گئی۔ اس موقع پر کمانڈنٹ میوند بریگیڈ کرنل فاروق اشرف اور ڈپٹی کمشنر کوہلو عظیم جان دومڑ نے شہید کے مزار پر حاضری دی، فاتحہ خوانی کی اور ملک و قوم کی سلامتی، استحکام اور شہداء کے بلند درجات کے لیے خصوصی دعائیں کیں۔

تقریب میں ونگ کمانڈر لیفٹیننٹ کرنل طحہٰ علی خان، شہید کے بھائی عالم زیب مری، ایگزیکٹو انجنیئر محبت مری، اسسٹنٹ کمشنر کاہان مصطفیٰ شفیع، اسسٹنٹ کمشنر ماوند سمیع الحق، اسسٹنٹ سوشل ویلفیئر آفیسر میر زمان مری سمیت ضلعی انتظامیہ کے افسران، قبائلی عمائدین، سیاسی و سماجی شخصیات، نوجوانوں اور شہریوں کی بڑی تعداد نے شرکت کی۔

(جاری ہے)

اس موقع پر ایف سی کے چاک و چوبند دستے نے شہید کو گارڈ آف آنر پیش کیا، جبکہ کمانڈنٹ میوند بریگیڈ کرنل فاروق اشرف نے شہید کے مزار پر پھولوں کی چادر اور گلدستہ پیش کیا۔

شرکاء نے شہید کی بے مثال قربانی، جرات اور وطن سے وفاداری کو خراجِ عقیدت پیش کرتے ہوئے کہا کہ شہداء قوم کا فخر اور ملکی سلامتی کی مضبوط بنیاد ہیں۔ انہوں نے کہا کہ لیفٹیننٹ جہانگیر مری شہید کی قربانی ہمیشہ آنے والی نسلوں کے لیے حب الوطنی، بہادری اور ایثار کی روشن مثال بنی رہے گی، جبکہ قوم اپنے شہداء کی قربانیوں کو کبھی فراموش نہیں کرے گی۔

بعد ازاں بنیادی مرکز صحت (BHU) شہید جہانگیر آباد میں بلوچستان اسپیشل ڈویلپمنٹ انیشیٹو (BSDI) کے تحت تعمیر کیے گئے جدید لیبر روم کا باقاعدہ افتتاح کمانڈنٹ میوند بریگیڈ کرنل فاروق اشرف اور ڈپٹی کمشنر کوہلو عظیم جان دومڑ نے کیا۔ اس موقع پر ڈسٹرکٹ منیجر پی پی ایچ آئی رفیق بزدار اور محکمہ صحت کے دیگر افسران بھی موجود تھے۔ متعلقہ حکام نے منصوبے پر بریفنگ دیتے ہوئے بتایا کہ اس جدید لیبر روم کے قیام سے علاقے کی خواتین کو زچگی کی بہتر، محفوظ اور معیاری طبی سہولیات میسر آئیں گی، جس سے ماں اور بچے کی صحت کے تحفظ میں نمایاں بہتری آئے گی۔

افتتاح کے بعد کمانڈنٹ میوند بریگیڈ اور ڈپٹی کمشنر کوہلو نے جاری مون سون شجرکاری مہم کے سلسلے میں پودا بھی لگایا۔ عوامی و شہری حلقوں نے اس عزم کا اظہار کیا کہ ضلع کوہلو میں صحت، تعلیم، ماحولیات اور عوامی فلاح و بہبود کے ترقیاتی منصوبوں کے ذریعے عوام کی خدمت کا سفر اسی جذبے کے ساتھ جاری رکھا جائے گا۔\378