ریحان طارق کے حق میں فتوے دینے والوں میں ملک کے جید علماء شامل

محض سوال پوچھنا کسی بھی طرح سے توہین یا بے ادبی کے زمرے میں نہیں آتا؛ علماء کرام کے متفقہ فتاویٰ

ساجد علی منگل 14 جولائی 2026 13:29

ریحان طارق کے حق میں فتوے دینے والوں میں ملک کے جید علماء شامل

لاہور (اُردو پوائنٹ اخبارتازہ ترین۔ 14 جولائی 2026ء) توہینِ مذہب اور پیکا ایکٹ کے تحت درج مقدمے میں نامزد اینکر پرسن ریحان طارق کے حق میں فتوے دینے والوں میں ملک کے جید علماء شامل ہیں۔ اطلاعات کے مطابق اینکر ریحان طارق کو ان کا 6 روزہ جسمانی ریمانڈ ختم ہونے پر پولیس کے تفتیشی حکام کی جانب سے سخت ترین سکیورٹی حصار میں عدالت کے روبرو پیش کیا گیا، دورانِ سماعت تفتیشی ٹیم نے عدالت کو اب تک ہونے والی تفتیش اور کیس کی پیش رفت سے آگاہ کیا، عدالت نے فریقین کے تفصیلی دلائل سننے کے بعد ریحان طارق کا مزید جسمانی ریمانڈ دینے کی استدعا مسترد کرتے ہوئے انہیں جوڈیشل ریمانڈ پر جیل بھیجنے کا حکم صادر فرمایا اور آئندہ کارروائی کے لیے سماعت مقرر کر دی۔

بتایا گیا ہے کہ دورانِ سماعت اینکر پرسن ریحان طارق کی لیگل ٹیم نے عدالت میں دفاعی حکمتِ عملی کے تحت ملک کے مقتدر اور جید علماء کرام کے فتاویٰ جات عدالتی ریکارڈ کا حصہ بنوائے، ان فتاویٰ جات میں مذہبی اور تاریخی احادیث کا حوالہ دیتے ہوئے ممتاز مذہبی اسکالرز نے ریحان طارق کے مؤقف کی تائید کی۔

(جاری ہے)

اپ ڈیٹ :- اینکر پرسن ریحان طارق صاحب کو متنازع سوال کیس میں 6 دن کے جسمانی ریمانڈ کے بعد آج جوڈیشل بھیج دیا گیا ہے، ہماری لاء فرم نے رضا کارانہ 6 دن کے جسمانی ریمانڈ کی حمایت کی تھی کہ NNCIA کی طرف FIR میں عائد کردہ دفعات کے دفاع میں ثبوت پیش کئے جا سکیں۔ 6 دن کے جسمانی ریمانڈ کے… pic.twitter.com/8ov3iERxT1
— Mian Dawood Law Associates (@MDLA2019) July 14, 2026

بتایا جارہا ہے کہ ان علماء کرام میں مفتی عمران حنفی دارالافتاء جامعہ نعیمیہ، مفتی حنیف قریشی دارالافتاء جماعت اہلسنت، مفتی طارق مسعود، مفتی نعیم اشرف بٹ اور دیگر ممتاز علماء کرام شامل ہیں، علماء کرام نے اپنے متفقہ فتاویٰ میں قرار دیا ہے کہ اینکر پرسن ریحان طارق کی جانب سے پروگرام میں محض سوال پوچھنا کسی بھی طرح سے توہین یا بے ادبی کے زمرے میں نہیں آتا۔

مزید یہ بھی معلوم ہوا ہے کہ عدالت کی جانب سے جوڈیشل ریمانڈ پر جیل بھیجے جانے کے فوراً بعد ریحان طارق کے وکلاء کی جانب سے عدالت میں باقاعدہ ضمانت کی درخواست دائر کر دی گئی ہے، عدالت نے درخواستِ ضمانت کو سماعت کے لیے منظور کرتے ہوئے فریقین کو نوٹسز جاری کر دیئے ہیں، جس پر اب حتمی بحث جمعرات 16 جولائی 2026ء کو ہوگی۔