Live Updates

پیرا فورس اہلکار سرکاری ڈالہ لے کر سیرسپاٹے پر ناران نکل گیا

ویڈیو وائرل ہونے پر متعلقہ افسر کیخلاف کارروائی، پیرنٹ ڈیپارٹمنٹ واپس بھیج دیا گیا

ساجد علی منگل 14 جولائی 2026 16:23

پیرا فورس اہلکار سرکاری ڈالہ لے کر سیرسپاٹے پر ناران نکل گیا

لاہور (اُردو پوائنٹ اخبارتازہ ترین۔ 14 جولائی 2026ء) پنجاب انفورسمنٹ اینڈ ریگولیٹری اتھارٹی (پیرا) نے سوشل میڈیا پر وائرل ہونے والی اس ویڈیو کا سخت نوٹس لیتے ہوئے فوری محکمانہ کارروائی کی ہے جس میں ادارے کی آفیشل ڈبل کیبن گاڑی یعنی سرکاری ڈالے کو ناران کاغان میں سیر و تفریح کے لیے استعمال ہوتے ہوئے دیکھا گیا۔ تفصیلات کے مطابق سوشل میڈیا پر ایک ویڈیو تیزی سے زیرِ گردش تھی جس میں پنجاب کی نو تشکیل شدہ فورس پیرا فورس کا ایک سرکاری ڈبل کیبن ڈالہ ناران کاغان کی وادیوں میں موجود دیکھا گیا، ویڈیو بنانے والے شہریوں نے الزام عائد کیا تھا کہ مریم نواز کی قائم کردہ پیرا فورس کی یہ سرکاری گاڑی اور پٹرول مبینہ طور پر ایک سرکاری بابو کے اہل خانہ اور بچوں کو تفریحی مقامات کی سیر کروانے کے لیے بے دریغ استعمال کیا جا رہا ہے۔

(جاری ہے)

مال مفت دل بے رحم !

مریم نواز کی پیرا فورس کا سرکاری ڈالا ناران کاغان کی وادیوں میں سرکاری بابوؤں اور اُن کے اہل خانہ کو انجواۓ کروانے میں مصروف pic.twitter.com/xFlpXU6JxU
— Faizan Shaikh (@FaiziWithKhan) July 13, 2026

سوشل میڈیا پر معاملہ سامنے آتے ہی پیرا انتظامیہ نے ایک باضابطہ وضاحتی اعلامیہ جاری کیا جس میں واضح کیا گیا کہ ادارہ سرکاری گاڑیوں کے ذاتی یا غیر مجاز استعمال کی ہرگز اجازت نہیں دیتا، ادارے کی تمام سرکاری گاڑیوں کی نگرانی جدید جی پی ایس اور لائیو فلیٹ ٹریکنگ سسٹم کے ذریعے چوبیس گھنٹے کی جاتی ہے اور قواعد و ضوابط کی معمولی خلاف ورزی پر بھی فوری محکمانہ کارروائی عمل میں لائی جاتی ہے۔

وضاحتی اعلامیہ pic.twitter.com/4AFRBKKTa0
— PERA (@PERAPunjab) July 14, 2026

ترجمان پیرا فورس نے بتایا کہ سوشل میڈیا پر ویڈیو وائرل ہونے کے فوری بعد ادارے نے اپنے لائیو ٹریکنگ سسٹم کے ذریعے متعلقہ گاڑی کی نقل و حرکت اور لوکیشن کا ڈیٹا چیک کیا، ٹریکنگ سسٹم سے ضابطہ شکنی کی تصدیق ہونے کے بعد پیرا نے فوری طور پر ایکشن لیا، متعلقہ گاڑی کو غیر مجاز طور پر نجی مقاصد کے لیے استعمال کرنے پر فوری محکمانہ کارروائی شروع کی گئی، اس سنگین لاپرواہی اور ضابطہ شکنی پر ذمہ دار متعلقہ افسر کی خدمات واپس ان کے اصل محکمے کو سونپ دی گئی ہیں، اس کا باقاعدہ 'ریپیٹری ایشن آرڈر' بھی جاری کر دیا گیا۔

پیرا فورس انتظامیہ نے اپنے اعلامیے میں واضح کیا ہے کہ وہ قانون کی یکساں عملداری پر پختہ یقین رکھتی ہے، سرکاری وسائل کا ذاتی استعمال کسی صورت برداشت نہیں کیا جائے گا اور مستقبل میں بھی سرکاری گاڑیوں یا وسائل کے غیر مجاز استعمال اور قواعد و ضوابط کی خلاف ورزی کرنے والوں کے خلاف بلا امتیاز سخت ترین تادیبی کارروائیوں کا سلسلہ جاری رہے گا۔