سعودی عرب پر حملے خودمختاری کی خلاف ورزی ہیں، مشکل وقت میں ساتھ کھڑے ہیں، وزیرِاعظم

خطے میں پائیدار امن کے قیام اور کشیدگی کو کم کرنے کے لیے تمام ممالک کو اپنا ذمہ دارانہ کردار ادا کرنا ہوگا تاکہ مستقبل میں ایسے ناخوشگوار واقعات کا سدِباب کیا جا سکے؛ شہباز شریف کا بیان

ساجد علی منگل 14 جولائی 2026 17:43

سعودی عرب پر حملے خودمختاری کی خلاف ورزی ہیں، مشکل وقت میں ساتھ کھڑے ..

اسلام آباد (اُردو پوائنٹ اخبارتازہ ترین۔ 14 جولائی 2026ء) وزیرِ اعظم شہباز شریف نے سعودی عرب پر ہونے والے حالیہ حملوں کی سخت ترین الفاظ میں مذمت کرتے ہوئے واضح کیا ہے کہ پاکستان مشکل کی اس گھڑی میں سعودی عرب کے ساتھ مکمل یکجہتی کے ساتھ کھڑا ہے۔ تفصیلات کے مطابق وزیرِ اعظم شہباز شریف نے اپنے ایک بیان میں کہا ہے کہ سعودی عرب کے خلاف کیے گئے کھلے اور واضح حملوں کی پاکستان شدید ترین الفاظ میں مذمت کرتا ہے، اس طرح کی قابلِ مذمت کارروائیاں براہِ راست سعودی عرب کی خودمختاری اور علاقائی سالمیت کی کھلی خلاف ورزی ہیں، جو پورے خطے میں امن اور استحکام کو مزید نقصان پہنچانے کا سبب بن سکتی ہیں۔

وزیرِ اعظم نے سعودی عرب کی سلامتی کیلئے پاکستان کی غیر متزلزل اور تاریخی حمایت کا اعادہ کرتے ہوئے کہا کہ اس نازک وقت میں پاکستان اپنے برادر ملک کے ساتھ کندھے سے کندھا ملا کر کھڑا ہے، پاکستان اور سعودی عرب کے درمیان برادرانہ تعلقات انتہائی مضبوط اور تاریخی نوعیت کے ہیں، اور پاکستان ہمیشہ سعودی عرب کے امن، سلامتی اور پائیدار استحکام کے لیے اپنا کلیدی کردار ادا کرتا رہے گا۔

(جاری ہے)

شہباز شریف نے مزید کہا کہ پاکستان خطے میں امن، استحکام، سلامتی اور باہمی احترام کو فروغ دینے والی تمام تر مخلصانہ کوششوں کی حمایت جاری رکھے گا، انہوں نے اس بات پر خصوصی زور دیا کہ خطے میں پائیدار امن کے قیام اور کشیدگی کو کم کرنے کے لیے تمام ممالک کو اپنا ذمہ دارانہ کردار ادا کرنا ہوگا تاکہ مستقبل میں ایسے ناخوشگوار واقعات کا سدِباب کیا جا سکے۔