’’فٹ بال کو فروخت کرنے کا کوئی منصوبہ زیر غور نہیں ‘‘، فیفا کا رکن ایسوسی ایشنز کو اعتماد میں لینے کا فیصلہ

جمعہ 31 جولائی 2026 12:47

زیورخ (اُردو پوائنٹ اخبارتازہ ترین - اے پی پی۔ 31 جولائی2026ء) انٹرنیشنل فیڈریشن آف ایسوسی ایشن فٹ بال (فیفا) نے 'فیفا فارورڈ انٹرپرائز' کی تجویز سے متعلق میڈیا پر پھیلنے والی غلط خبروں کو مسترد کرتے ہوئے واضح کیا ہے کہ فٹ بال کو فروخت کرنے کا کوئی منصوبہ زیر غور نہیں ہے اور تمام فیصلہ سازی جمہوری اور شفاف طریقے سے کی جائے گی۔ فیفا کی جانب سے جاری کردہ وضاحتی بیان میں کہا گیا ہے کہ میڈیا میں آنے والی غلط رپورٹوں نے طے شدہ مشاورتی عمل کو متاثر کیا، تاہم فیفا تمام 211 ممبر ایسوسی ایشنز کے خدشات اور ردعمل کا احترام کرتا ہے۔

فیفا کے مطابق اس تجویز کا مقصد تمام رکن ممالک کو اپنے علاقوں میں فٹ بال کی تجارتی ترقی میں حصہ دار بنانا ہے، جس سے کھیل کی بنیادی روح یا گورننس پر کوئی سمجھوتہ نہیں ہوگا۔

(جاری ہے)

تجویز کی تفصیلات بیان کرتے ہوئے فیفا کا کہنا ہے کہ اس منصوبے کے تحت تمام تجارتی و آپریشنل سرگرمیاں فیفا کے مکمل کنٹرول میں رہنے والی ذیلی کمپنی کو منتقل کی جائیں گی، جس کے بعد تمام 211 ممبر ایسوسی ایشنز کو 2027 سے 2030 کے دوران 2 کروڑ امریکی ڈالر کی ترقیاتی فنڈنگ فراہم کی جائے گی۔

مزید برآں، اضافی 2 کروڑ ڈالر کا 'فاسٹ فارورڈ پروگرام' بیرونی سرمایہ کاری سے حاصل کیا جائے گا جس میں رکن ممالک کے لیے شمولیت مکمل طور پر اختیاری ہوگی۔ فیفا نے واضح کیا ہے کہ یہ تمام تجاویز حتمی نہیں ہیں بلکہ ان پر تعمیری بحث، ترمیم یا انہیں مسترد کرنے کا مکمل حق تمام ممبر ایسوسی ایشنز کو حاصل ہے، اور اگر اکثریت نے حمایت نہ کی تو موجودہ تجارتی ڈھانچے میں کوئی تبدیلی نہیں کی جائے گی۔