Live Updates

ایران کرکٹ ایسوسی ایشن کے وفد کا پی سی بی ہیڈکوارٹرز اور قذافی اسٹیڈیم کا دورہ

جمعرات 13 اگست 2026 15:54

لاہور (اُردو پوائنٹ اخبارتازہ ترین - اے پی پی۔ 13 اگست2026ء) ایران کرکٹ ایسوسی ایشن کے وفد نے لاہور میں پاکستان کرکٹ بورڈ (پی سی بی) کے ہیڈکوارٹرز اور قذافی اسٹیڈیم کا دورہ کیا، جہاں پی سی بی حکام کے ساتھ ایران میں کرکٹ کے فروغ و ترقی اور پاکستان و ایران کے درمیان کرکٹ کے شعبے میں باہمی تعاون بڑھانے پر اہم بات چیت ہوئی۔ایرانی وفد نے پی سی بی کے چیف آپریٹنگ آفیسر سمیر احمد سید اور پاکستان سپر لیگ (پی ایس ایل) کے چیف ایگزیکٹو آفیسر سلمان نصیر سے ملاقات کی۔

ترجمان پی سی بی کے مطابق ملاقات میں ایران میں کرکٹ کے فروغ، قومی و جونیئر ٹیموں کی ترقی اور دونوں ممالک کے درمیان کرکٹ کے روابط مزید مضبوط بنانے کے مختلف امور پر تبادلہ خیال کیا گیا۔وفد نے قذافی سٹیڈیم، کرکٹ میوزیم اور نیشنل کرکٹ اکیڈمی کا دورہ بھی کیا، جہاں ایرانی وفد نے کھلاڑیوں کی تربیت کے لیے دستیاب سہولیات اور جدید تربیتی نظام کا جائزہ لیا۔

(جاری ہے)

ملاقات کے دوران ایرانی قومی اور جونیئر کرکٹ ٹیموں کو کوچنگ معاونت فراہم کرنے، پاکستانی کوچز کی جانب سے ایرانی کھلاڑیوں اور ٹیموں کو کوچنگ تجربہ و تکنیکی مہارت منتقل کرنے اور دونوں ممالک کے درمیان کوچنگ علم و تجربات کے تبادلے کے امکانات پر تفصیلی گفتگو ہوئی۔دونوں جانب سے کرکٹ انفرااسٹرکچر کی ترقی میں تعاون کے ساتھ ساتھ ایرانی کرکٹ کے لیے کھیلوں اور کرکٹ کے سازوسامان کی فراہمی میں معاونت کے امور بھی زیر غور آئے۔

جونیئر اور سینئر سطح پر ایرانی کرکٹرز کی ضروریات کی نشاندہی اور انہیں پورا کرنے کے لیے ممکنہ تعاون پر بھی تبادلہ خیال کیا گیا۔پی سی بی اور ایران کرکٹ ایسوسی ایشن نے کرکٹ کے فروغ اور ترقی کے مشترکہ مقصد کے تحت تکنیکی معلومات، کوچنگ تجربات اور مہارت کے تبادلے سمیت باہمی تعاون کے مزید مواقع تلاش کرنے پر اتفاق کیا۔