کراچی میں خواجہ سراﺅں کا تھانے پر پتھراﺅ،پولیس نے مقدمہ درج کرلیا

خواجہ سراﺅں نے الزامات کو پولیس کی روایتی کاروائی قراردیتے ہوئے غیرجانبدرانہ انکوائری کا مطالبہ کردیا

میاں محمد ندیم اتوار 2 اگست 2026 12:50

کراچی میں خواجہ سراﺅں کا تھانے پر پتھراﺅ،پولیس نے مقدمہ درج کرلیا

کراچی(اردوپوائنٹ اخبارتازہ ترین-انٹرنیشنل پریس ایجنسی۔02 اگست ۔2026 ) کراچی میں خواجہ سراﺅں کا تھانے میں گھس کر پتھراﺅ، سیف سٹی کیمروں اور موبائل کے شیشے توڑنے کا مقدمہ بوٹ بیسن تھانے میں سرکاری مدعیت میں درج کر لیا گیا پولیس کا بتانا ہے کہ چند روز قبل پیش آئے واقعے کا مقدمہ سرکار کی مدعیت میں درج کرکے 3 خواجہ سراﺅں کو گرفتار کرلیا گیا ہے.

(جاری ہے)

پولیس حکام کے مطابق خواجہ سراﺅں نے مشتعل ہو کر بڑی تعداد میں تھانے میں داخل ہو کر گالم گلوچ کرتے ہوئے کھڑی گاڑیوں کے شیشے توڑے، پولیس اہلکاروں نے سمجھانے کی کوشش کی تو خواجہ سراﺅں نے سیف سٹی روم کے دروازے توڑے مقدمے کے متن میں بتایا گیا ہے کہ منع کرنے کے باوجود مشتعل خواجہ سراﺅں نے سائلین کو بھی زد و کوب کیا تھا، مقدمے میں 8 خواجہ سراﺅں کو نامزد کیا گیا تھا. پولیس کا بتانا ہے کہ اسسٹنٹ کمشنر کی ہدایت پر گداگری ایکٹ کے تحت چند بھکاریوں کو گرفتار کیا تھا، حراست میں لینے کے دوران ایک خواجہ سرا کی ناک سے خون نکلا جسے خواجہ سراﺅں نے تشدد کا رنگ دینے کی کوشش کی تھی ادھر خواجہ سراﺅں نے الزامات کو پولیس کی روایتی کاروائی قراردیتے ہوئے غیرجانبدرانہ انکوائری کا مطالبہ کیا ہے .