خیرپور میں اعلیٰ معیار کے لیتھیم کی دریافت

او جی ڈی سی ایل اور پنس ٹیک کے درمیان معاہدہ، پاکستان میں مقامی لیتھیم صنعت کے قیام کی راہ ہموار

بدھ 5 اگست 2026 11:41

خیرپور میں اعلیٰ معیار کے لیتھیم کی دریافت

کراچی (اُردو پوائنٹ اخبارتازہ ترین - این این آئی۔ 05 اگست2026ء) پاکستان میں معدنی وسائل کی ترقی کے حوالے سے ایک اہم پیش رفت سامنے آئی ہے، جہاں سندھ کے ضلع خیرپور میں اعلیٰ معیار کے لیتھیم کی دریافت کے بعد ملک میں پہلی مقامی لیتھیم صنعت کے قیام کی جانب عملی اقدامات شروع کر دیے گئے ہیں۔اس سلسلے میں آئل اینڈ گیس ڈیولپمنٹ کمپنی لمیٹڈ (او جی ڈی سی ایل) اور پاکستان انسٹی ٹیوٹ آف نیوکلیئر سائنس اینڈ ٹیکنالوجی (پنس ٹیک) کے درمیان ایک اہم معاہدے پر دستخط کیے گئے ہیں۔

معاہدے کا مقصد خیرپور کے ایک کنویں سے حاصل ہونے والے جیوتھرمل نمکیاتی پانی (برائن) سے تجارتی پیمانے پر لیتھیم نکالنے کے لیے جدید ٹیکنالوجی تیار کرنا ہے۔ذرائع کے مطابق خیرپور میں ہونے والی ابتدائی تحقیقات کے دوران اعلیٰ معیار کے لیتھیم کی موجودگی کے شواہد سامنے آئے ہیں، جس کے بعد اس معدنی وسائل سے صنعتی بنیادوں پر استفادہ حاصل کرنے کے امکانات روشن ہو گئے ہیں۔

(جاری ہے)

اس مقصد کے لیے جدید سائنسی تحقیق اور مقامی ٹیکنالوجی کی تیاری پر خصوصی توجہ دی جائے گی تاکہ درآمدی انحصار کم کیا جا سکے۔ذرائع نے بتایا کہ سندھ میں لیتھیم کی تلاش کا دائرہ بھی مزید وسیع کرنے کا فیصلہ کیا گیا ہے اور صوبے میں مزید آٹھ سے دس کنوؤں پر تحقیقی اور تجزیاتی کام کیا جائے گا تاکہ لیتھیم کے ذخائر کا درست اندازہ لگایا جا سکے اور مستقبل میں اس کی تجارتی پیداوار کے امکانات کا جائزہ لیا جا سکے۔

ماہرین کے مطابق لیتھیم الیکٹرک گاڑیوں، موبائل فونز، لیپ ٹاپس، توانائی ذخیرہ کرنے والے نظام (انرجی اسٹوریج) اور جدید بیٹریوں کی تیاری میں بنیادی خام مال کی حیثیت رکھتا ہے، جبکہ دنیا بھر میں صاف توانائی اور برقی گاڑیوں کی بڑھتی ہوئی طلب کے باعث اس دھات کی اہمیت میں مسلسل اضافہ ہو رہا ہے۔