سیالکوٹ ،چیمبر میں یورپی یونین کے کاربن بارڈر ایڈجسٹمنٹ میکنزم پر آگاہی سیمینار 19 اگست کو ہوگا

پیر 10 اگست 2026 16:25

سیالکوٹ (اُردو پوائنٹ اخبارتازہ ترین - اے پی پی۔ 10 اگست2026ء) سیالکوٹ چیمبر آف کامرس اینڈ انڈسٹری کے زیر اہتمام یورپی یونین کے کاربن بارڈر ایڈجسٹمنٹ میکنزم (EU-CBAM) کے حوالے سے آگاہی سیمینار 19 اگست 2026ء کو شیخ محمد شفیع ہال میں منعقد ہوگا۔ سیمینار کا اہتمام SGS پاکستان کی جانب سے کیا جا رہا ہے، جس کا مقصد کاروباری برادری اور برآمد کنندگان کو یورپی یونین کی جانب سے نافذ کیے جانے والے کاربن بارڈر ایڈجسٹمنٹ میکنزم، اس کے ممکنہ اثرات اور بین الاقوامی تجارتی تقاضوں سے آگاہ کرنا ہے۔

سیمینار دوپہر 2 بج کر 30 منٹ پر شروع ہوگا۔سیالکوٹ چیمبر آف کامرس اینڈ انڈسٹری کے صدر سید اہتشام مظہر کی میزبانی میں منعقد ہونے والے آگاہی سیشن میں شعبہ تحقیق و پائیدار ترقی سے وابستہ ماہرین اور SGS پاکستان کے ماہرین شرکت کریں گے۔

(جاری ہے)

اس موقع پر ڈاکٹر رضا اللہ شاہ، چیئرمین ڈیپارٹمنٹل کمیٹی آن ریسرچ مینجمنٹ فار سسٹین ایبل ڈویلپمنٹ، اور مس کنول شہزادی، GHG لیڈ آڈیٹر SGS پاکستان، شرکاء کو EU-CBAM کے مختلف پہلوؤں کے بارے میں بریفنگ دیں گے، سیمینار میں گرین ہاؤس گیسز (GHG) اکاؤنٹنگ کے طریقہ کار، موسمیاتی تقاضوں سے ہم آہنگ سپلائی چینز، ماحولیاتی، سماجی و انتظامی (ESG) اصولوں کی تعمیل اور پاکستان کے برآمد کنندگان کے لیے عالمی سطح پر ابھرتے ہوئے پائیدار کاروباری تقاضوں سے ہم آہنگ ہونے کے عملی اقدامات پر تفصیلی روشنی ڈالی جائے گی۔

مقررین شرکاء کو آگاہ کریں گے کہ یورپی منڈیوں میں کاروباری سرگرمیوں اور برآمدات کو برقرار رکھنے کے لیے کاربن اخراج سے متعلق ڈیٹا، گرین ہاؤس گیسز کی پیمائش و رپورٹنگ اور ماحولیاتی معیارات کی پاسداری کس قدر اہمیت اختیار کر رہی ہے۔ سیمینار کا مقصد صنعتکاروں اور برآمد کنندگان کو ان تبدیلیوں کے لیے بروقت تیار کرنا اور انہیں بین الاقوامی سطح پر مسابقتی تقاضوں سے ہم آہنگ ہونے میں معاونت فراہم کرنا ہے۔سیالکوٹ چیمبر آف کامرس اینڈ انڈسٹری کی جانب سے کاروباری برادری، صنعتکاروں اور متعلقہ شعبوں سے وابستہ افراد کو سیمینار میں شرکت کی دعوت دی گئی ہے تاکہ وہ EU-CBAM سے متعلق اہم معلومات، ماہرین کی آراء اور عملی رہنمائی سے استفادہ کرسکیں۔\378