Live Updates

پیٹرولیم ڈیلرز کا 15 اگست سے غیرمعینہ مدت کیلئے پیٹرول پمپس بند رکھنے کا اعلان

صبر کا پیمانہ لبریز ہوچکا ہے، مطالبات کی منظوری تک پیٹرول پمپس نہیں کھولیں گے، چیئرمین پیٹرولیم ڈیلرزایسوسی ایشن ملک خدا بخش

ثنااللہ ناگرہ منگل 11 اگست 2026 19:33

پیٹرولیم ڈیلرز کا 15 اگست سے غیرمعینہ مدت کیلئے پیٹرول پمپس بند رکھنے ..

کراچی ( اردوپوائنٹ اخبار تازہ ترین ۔ انٹرنیشنل پریس ایجنسی ۔ 10 اگست 2026ء ) پیٹرولیم ڈیلرز ایسوسی ایشن نے مطالبات کی منظوری تک 15 اگست سے غیرمعینہ مدت کیلئے پیٹرول پمپس بند رکھنے کا اعلان کردیا ہے۔ میڈیا کے مطابق چیئرمین پیٹرولیم ڈیلرزایسوسی ایشن ملک خدا بخش کا کہنا ہے کہ صبر کا پیمانہ لبریز ہوچکا ہے، مطالبات کی منظوری تک پیٹرول پمپس نہیں کھولیں گے۔

15 اگست کو صبح 6 بجے سے غیرمعینہ مدت تک ملک بھر میں پیٹرول پمپس کی بندش شروع ہوگی اور مطالبات کی منظوری تک ہڑتال جاری رہے گی۔ چیئرمین پیٹرولیم ڈیلرزایسوسی ایشن ملک خدا بخش نے کہا کہ 14 ہزار ممبران کا دباؤ ہے، صبر کا پیمانہ لبریز ہوچکا ہے، مطالبات کی منظوری تک پیٹرول پمپس نہیں کھولیں گے۔ دوسری جانب بین الاقوامی منڈی میں منگل کو خام تیل کی قیمتوں میں اضافے کا رجحان رہا۔

(جاری ہے)

بلوم برگ کی رپورٹ کے مطابق کاروباری سرگرمیوں کے دوران امریکی خام تیل ڈبلیو ٹی آئی کے ستمبر کے لیے معاہدے 1.50 ڈالر اضافے سے 83.63 ڈالر فی بیرل اور برینٹ نارتھ سی کروڈ کے اکتوبر کے لئے سودے 1.59 ڈالر اضافے سے 89.31 ڈالر فی بیرل میں طے پائے۔کموڈٹی مارکیٹ میں سونے اور اجناس کے نرخوں میں تیزی جبکہ چاندی میں کمی ہوئی ۔ سونے کے نرخ 3.30 ڈالر اضافے سے 4423.00 ڈالر فی اونس تک پہنچ گئے تاہم چاندی کی قیمت 0.60 ڈالر کمی سے 64.68ڈالر فی اونس پر آگئی۔ مکئی کے دسمبر کے لئے سودے 0.25 ڈالر اضافے سے 462.00 جبکہ گندم کے دسمبر کے لئے معاہدے 1.25 ڈالر اضافے سے 660.50 ڈالر فی بشل میں طے پائے۔