ح*پنجاب پولیس کی اینٹی کائٹ فلائنگ ایکٹ کی خلاف ورزی پر کاروائیاں جاری

ًرواں سال لاہور سمیت صوبہ بھر میں انسداد پتنگ بازی ایکٹ کی خلاف ورزی پر 10 ہزار سے زائد ملزمان گرفتار

منگل 11 اگست 2026 19:35

لاہور (اُردو پوائنٹ اخبارتازہ ترین - آن لائن۔ 11 اگست2026ء) انسپکٹر جنرل پولیس پنجاب عبدالکریم کی ہدایت پر پنجاب پولیس صوبہ بھر میں اینٹی کائٹ فلائنگ ایکٹ کی خلاف ورزی کرنے والوں کے خلاف بھرپور کارروائیاں جاری رکھے ہوئے ہے۔ ترجمان پنجاب پولیس نے تفصیلات سے آگاہ کرتے ہوئے بتایا کہ رواں سال لاہور سمیت صوبہ بھر میں انسداد پتنگ بازی ایکٹ کی خلاف ورزی پر 10 ہزار سے زائد ملزمان کو گرفتار کر کے 9724 مقدمات درج کیے گئے اس دوران 4 لاکھ 79 ہزار 598 پتنگیں اور 15 ہزار 518 ڈور چرخیاں بھی برآمد کی گئیں۔

ترجمان پنجاب پولیس نے مزید بتایا کہ صوبائی دارالحکومت لاہور میں 4769 ملزمان کو گرفتار کیا گیا جبکہ 4589 مقدمات درج کیے گئے۔ لاہور میں 1 لاکھ 26 ہزار 488 پتنگیں اور 5168 ڈور چرخیاں بھی برآمد کی گئیں۔

(جاری ہے)

آئی جی پنجاب عبدالکریم نے واضح ہدایت جاری کی ہے کہ صوبہ بھر میں کسی بھی جگہ پتنگ بازی ہرگز قابل برداشت نہیں اور اس خطرناک سرگرمی میں ملوث عناصر کے خلاف بلا امتیاز سخت کارروائی عمل میں لائی جائے۔

انہوں نے مزید کہا کہ دھاتی ڈور اور پتنگوں کے آن لائن کاروبار میں ملوث عناصر کو بھی قانون کی گرفت میں لایا جائے۔آئی جی پنجاب نے والدین سے اپیل کی کہ وہ اپنے بچوں کو اس خونی کھیل سے دور رکھیں جبکہ شہری کسی بھی مقام پر پتنگ بازی کی صورت میں فوری طور پر 15 پر اطلاع دے کر ذمہ داری کا ثبوت دیں۔