عدالتی حکم کے باوجود آواب علوی کا نام کنٹرول لسٹ سے نہ نکالنے پر سندھ ہائیکورٹ برہم

جمعرات 13 اگست 2026 16:22

کراچی (اُردو پوائنٹ اخبارتازہ ترین - این این آئی۔ 13 اگست2026ء) : سندھ ہائیکورٹ نے سابق صدر ڈاکٹر عارف علوی کے بیٹے آواب علوی کا نام عدالتی حکم کے باوجود کنٹرول لسٹ سے نہ نکالنے پر متعلقہ حکام پر برہمی کا اظہار کرتے ہوئے ڈی جی ایف آئی اے سمیت دیگر افسران کو آئندہ سماعت پر ذاتی حیثیت میں طلب کرلیا۔آواب علوی کی جانب سے دائر توہین عدالت کی درخواست پر سماعت کے دوران درخواست گزار کے وکیل ہاشم سہرانی نے مؤقف اختیار کیا کہ عدالت کے حکم کے باوجود آواب علوی کا نام کنٹرول لسٹ سے نہیں نکالا گیا۔

وکیل نے عدالت کو بتایا کہ آواب علوی کا نام پی این آئی ایل میں شامل کیا گیا تھا اور سندھ ہائیکورٹ نے 19 فروری کو نام کنٹرول لسٹ سے نکالنے کا حکم دیا تھا، تاہم عدالتی حکم پر عملدرآمد نہیں کیا گیا۔

(جاری ہے)

وکیل کے مطابق آواب علوی کو 7 اپریل کو سری لنکا جاتے ہوئے روک دیا گیا تھا۔سماعت کے دوران عدالت نے متعلقہ حکام کے طرز عمل پر اظہار برہمی کرتے ہوئے آئندہ سماعت پر ڈی جی ایف آئی اے کو طلب کرلیا۔

عدالت نے ڈائریکٹر ایف آئی اے منتظر مہدی اور ڈپٹی ڈائریکٹر امیگریشن شہزاد اکبر کو بھی ذاتی حیثیت میں پیش ہونے کا حکم دیا۔عدالت نے ریمارکس دیے کہ متعلقہ حکام خود پیش ہوں، بصورت دیگر ان کے خلاف توہین عدالت کی کارروائی شروع کی جائے گی۔ سندھ ہائیکورٹ نے درخواست کی مزید سماعت دو ہفتوں کے لیے ملتوی کردی۔