پائلٹ آفیسر راشد منہاس شہید (نشانِ حیدر) کا 55 واں یوم شہادت، دفاع وطن کی لازوال داستان

جمعرات 20 اگست 2026 08:53

اسلام آباد (اُردو پوائنٹ اخبارتازہ ترین - اے پی پی۔ 20 اگست2026ء) پائلٹ آفیسر راشد منہاس شہید (نشانِ حیدر)پاک فضائیہ کے جوانوں اورپوری قوم کیلئے حب الوطنی، فرض شناسی اوروطن سے وفاداری کی روشن مثال ہیں۔ پائلٹ آفیسرراشد منہاس شہید 17فروری1951 کو کراچی میں پیدا ہوئے۔ انہوں نے 14مارچ1971 کو پاکستان فضائیہ کے51 ویں جی ڈی پی کورس میں کمیشن حاصل کیا۔

ان کو آپریشنل کنورژن کورس کیلئے ماڑی پور(مسرور) میں واقع نمبر 2 اسکواڈرن میں تعینات کیا گیا۔ 20 اگست1971کو پائلٹ آفیسرراشد منہاس نے تربیتی پروازکیلئے کراچی کے مسرورایئر بیس سے اڑان بھری۔ انسٹرکٹر پائلٹ فلائٹ لیفٹیننٹ مطیع الرحمان نے طیارے کو ہائی جیک کرکے بھارت لے جانے کی کوشش کی۔ بھارتی سرحد سے صرف 40 میل کی مسافت پر پائلٹ آفیسرراشد منہاس نے طیارے کا رخ واپس پاکستان کی طرف موڑنے کی بھرپور کوشش کی۔

(جاری ہے)

انسٹرکٹر کی تمام ترکوشش کے باوجود راشد منہاس نے جہاز کا رخ زمین کی جانب موڑ کر طیارے کو بھارتی سرحد سے 32 میل کی دوری پر تباہ کردیا۔ پائلٹ آفیسرراشد منہاس نے اپنی جان قربان کرکے طیارے کو دُشمن ملک لے جانے کی مذموم سازش کو ناکام بنا دیا۔ وطن کے اس بہادرسپوت نے اپنی جان مادر وطن پر قربان کردی لیکن ملکی وقارپر آنچ تک نہیں آنے دی۔ پائلٹ آفیسرراشد منہاس شہید پاکستان کی دفاعی تاریخ میں سنہرا باب رقم کرنے والے وطن کے عظیم سپوت ہیں۔