خواتین کی ترقی پاکستان کی ترقی کا بنیادی تقاضا ہے، فرح ناز اکبر

gاسلام آباد(اُردو پوائنٹ اخبارتازہ ترین - آن لائن۔ 23 اگست2026ء) ممبر قومی اسمبلی، پارلیمانی سیکرٹری برائے قومی ورثہ و ثقافت اور صدر پاکستان مسلم لیگ (ن) ویمن ونگ اسلام آباد محترمہ فرح ناز اکبر نے خواتین کی ترقی، بااختیاری اور معاشرے میں ان کے مؤثر کردار کے حوالے سے منعقدہ سیمینار سے خطاب کرتے ہوئے کہا ہے کہ خواتین کی ترقی صرف خواتین کا مسئلہ نہیں بلکہ پاکستان کی ترقی کا بنیادی تقاضا ہے۔

فرح ناز اکبر نے کہا کہ جس معاشرے کی نصف آبادی کو آگے بڑھنے کے مساوی مواقع حاصل ہوں، وہی معاشرہ حقیقی معنوں میں ترقی کر سکتا ہے۔ خواتین کو تعلیم، ہنر، کاروبار، ٹیکنالوجی، ڈیجیٹل معیشت، سیاست، قیادت اور فیصلہ سازی کے ہر میدان میں آگے بڑھنے کے مواقع فراہم کرنا وقت کی اہم ضرورت ہے۔

(جاری ہے)

انہوں نے کہا کہ پاکستان کی نوجوان خواتین تعلیم اور جدید ٹیکنالوجی کے میدان میں بے پناہ صلاحیت رکھتی ہیں۔

مناسب تربیت، مالی سہولیات، کاروباری مواقع اور مارکیٹ تک رسائی فراہم کرکے خواتین نہ صرف اپنے خاندانوں کو معاشی طور پر مضبوط بنا سکتی ہیں بلکہ ملکی معیشت میں بھی اہم کردار ادا کر سکتی ہیں۔پارلیمانی سیکرٹری برائے قومی ورثہ و ثقافت نے کہا کہ بالخصوص دیہی اور پسماندہ علاقوں کی خواتین کو ترقی کے عمل میں شامل کرنا ضروری ہے۔ دستکاری، ثقافتی فنون، گھریلو صنعت اور ای کامرس کے ذریعے خواتین کے لیے باعزت روزگار اور معاشی خودمختاری کے مواقع پیدا کیے جا سکتے ہیں۔

فرح ناز اکبر نے کہا کہ خواتین ہماری ثقافت، روایات اور قومی ورثے کی حقیقی محافظ ہیں۔ روایتی ہنر اور ثقافتی فنون کو جدید مارکیٹ سے منسلک کرکے قومی ورثے کو محفوظ بنانے کے ساتھ ساتھ خواتین کے لیے روزگار اور آمدن کے نئے ذرائع بھی پیدا کیے جا سکتے ہیں۔انہوں نے کہا کہ خواتین کی سیاسی شمولیت جمہوریت کو مضبوط بناتی ہے۔ خواتین کو سیاسی عمل، قانون سازی اور فیصلہ سازی میں مؤثر کردار دینا وقت کی ضرورت ہے۔

پاکستان مسلم لیگ (ن) کی قیادت نے ہمیشہ خواتین کی تعلیم، معاشی خودمختاری اور سیاسی شرکت کو اہمیت دی ہے۔فرح ناز اکبر نے خواتین پر زور دیا کہ وہ اپنی صلاحیتوں پر یقین رکھیں، اپنی آواز مؤثر انداز میں بلند کریں اور اپنے خوابوں کو حقیقت بنانے کے لیے آگے بڑھیں۔انہوں نے کہا کہ ہمیں ایسا پاکستان تشکیل دینا ہے جہاں ہر بیٹی کو تعلیم، ہر عورت کو عزت، ہر ہنرمند خاتون کو روزگار اور ہر باصلاحیت خاتون کو قیادت کا موقع حاصل ہو۔

انہوں نے کہا کہ خواتین بااختیار ہوں گی تو خاندان مضبوط ہوگا، خاندان مضبوط ہوگا تو معاشرہ مضبوط ہوگا، اور مضبوط معاشرہ ہی مضبوط پاکستان کی بنیاد بنے گا۔آخر میں فرح ناز اکبر نے سیمینار کے منتظمین کو خواتین کی ترقی اور بااختیاری جیسے اہم موضوع پر مؤثر پلیٹ فارم فراہم کرنے پر خراجِ تحسین پیش کیا اور کہا کہ پاکستان کی ترقی خواتین کی ترقی سے جڑی ہوئی ہے۔