سا نحہ پمز قدرتی حادثہ نہیں بلکہ مجرمانہ غفلت تھی، مہر بخاری

آگ کہیں بھی لگ سکتی ہے، کسی نجی ہسپتال، گھر یا کسی بھی جگہ آگ لگ سکتی ہے، لیکن اگر آگ سے نمٹنے کے لیے حفاظتی اقدامات موجود نہ ہوں تو یہ غفلت، بلکہ مجرمانہ غفلت کے زمرے میں آتا ہے، اینکر پرسن کی گفتگو

فیضان ہاشمی جمعہ 28 اگست 2026 11:29

سا نحہ پمز قدرتی حادثہ نہیں بلکہ مجرمانہ غفلت تھی، مہر بخاری

اسلام آباد(اُردو پوائنٹ اخبارتازہ ترین۔ 28 اگست2026ء) اینکر پرسن مہر بخاری کا پمز ہسپتال میں پیش آنے والے سانحے پر کہنا ہے کہ وہ بھی پمز سے واپس آئی ہیں اور چند گھنٹے وہاں گزارنے، کچھ والدین سے ملنے اور پوری جگہ کا جائزہ لینے کے بعد یہ بات بالکل واضح کرنا چاہتی ہیں کہ یہ حادثہ نہیں تھا، یہ غفلت تھی۔ مہر بخاری نے کہا کہ آگ کہیں بھی لگ سکتی ہے، کسی نجی ہسپتال، گھر یا کسی بھی جگہ آگ لگ سکتی ہے، لیکن اگر آگ سے نمٹنے کے لیے حفاظتی اقدامات موجود نہ ہوں تو یہ غفلت، بلکہ مجرمانہ غفلت کے زمرے میں آتا ہے۔

انہوں نے کہا کہ سامنے آنے والی رپورٹ کے مطابق حفاظتی انتظامات ناکافی، غیر معیاری اور مطلوبہ معیار پر پورا اترنے والے نہیں تھے۔ انکوائری رپورٹ میں بتایا گیا کہ سات ایمرجنسی راستے مستقل طور پر بند تھے، جبکہ سیکیورٹی اسٹاف کی جانب سے بھی رکاوٹیں کھڑی کی جا رہی تھیں۔

(جاری ہے)

ان کا کہنا تھا کہ بنیادی حفاظتی پروٹوکولز ہی موجود نہیں تھے۔

میں ابھی پمز سے واپس آئی ہوں، وہاں جو صورتحال دیکھی اور کچھ متاثرہ خاندانوں سے بات چیت کی، تو میں آپ سب کو بتانا چاہتی ہوں، کہ یہ ہوئی قدرتی حادثہ نہیں بلکہ کریمنل نیگلیجینس تھی، وہاں سیفٹی کے انتظامات ہی موجود نہیں تھے، مہر بخاری pic.twitter.com/817N95s0Sb
— Wahab Khan (@PkLeaderVoice) August 27, 2026

مہر بخاری نے کہا کہ ایک ماں کی حیثیت سے وہ سمجھ سکتی ہیں کہ نو ماہ تک بچے کو اپنے اندر رکھنے کے بعد والدین کے دل میں کتنی امیدیں ہوتی ہیں۔ انہوں نے کہا کہ دنیا چند دن، ہفتے یا مہینوں بعد آگے بڑھ جاتی ہے، لیکن بچے کو کھونے کا درد اور اندر کا خلا کبھی مکمل طور پر ختم نہیں ہوتا۔ انہوں نے بتایا کہ وہ متاثرہ والدین سے ملی ہیں، جہاں ایک باپ نے اپنے دو بیٹوں کی باقیات دکھائیں، جو صرف کالی راکھ اور ہڈیوں پر مشتمل تھیں اور پہچانی بھی نہیں جا سکتی تھیں۔

مہر بخاری نے کہا کہ جو لوگ کہہ رہے تھے کہ بچے دم گھٹنے سے ہلاک ہوئے، وہ صرف دم گھٹنے سے نہیں مرے بلکہ آگ میں جھلس کر ہلاک ہوئے ہیں۔ انہوں نے کہا کہ 14 خاندان اپنے گھروں میں اپنے ننھے بچوں کی جھلسی ہوئی لاشیں، کچھ صرف ہڈیاں اور راکھ لے کر گئے ہیں۔ انہوں نے تجویز دی کہ وزیراعظم اور کابینہ اپنے علاج کے لیے سرکاری ہسپتال استعمال کریں اور ان کے بچوں سمیت آنے والی نسلوں کا علاج بھی سرکاری ہسپتالوں میں ہو تو حفاظتی سرٹیفکیشن، نظام اور ایس او پیز بہتر ہوں گے۔