پولیس افسران و اہلکاروں کی بنیادی تنخواہوں میں 250 فیصد اضافہ متوقع

خیبرپختونخوا حکومت کی حتمی منظوری کی صورت میں باقاعدہ نوٹیفکیشن جاری کیا جائے گا. رپورٹ

میاں محمد ندیم جمعہ 28 اگست 2026 15:37

پشاور(اردوپوائنٹ اخبارتازہ ترین-انٹرنیشنل پریس ایجنسی۔28 اگست ۔2026 ) پولیس افسران و اہلکاروں کی بنیادی تنخواہوں میں 250 فیصد اضافہ متوقع ہے، حتمی منظوری کی صورت میں باقاعدہ نوٹیفکیشن جاری کیا جائے گا تفصیلات کے مطابق خیبرپختونخوا پولیس کے لیے دہشت گردی کے خلاف فرائض انجام دینے والے اہلکاروں کو ہارڈ ایریا الاﺅنس دینے سے متعلق سفارشات منظور کرلی گئی ہیں.

(جاری ہے)

پولیس حکام نے بتایا کہ محکمہ داخلہ خیبرپختونخوا نے پولیس کے لیے ہارڈ ایریا الاﺅنس کی سفارشات وفاقی حکومت کو بھجوائی تھیں، اب ہارڈ ایریاز کی نشاندہی کرکے متعلقہ اضلاع کی تفصیلات وفاقی حکومت کو ارسال کی جائیں گی حکام کا کہنا تھا کہ صوابی اور ہزارہ ڈویژن کے علاوہ خیبرپختونخوا کے تمام اضلاع کو ہارڈ ایریا قرار دینے کی تجویز دی جائے گی.

سفارشات وفاقی حکومت کو بھجوانے کے بعد حتمی منظوری کی صورت میں باقاعدہ نوٹیفکیشن جاری کیا جائے گا مجوزہ اقدام کے تحت پولیس افسران و اہلکاروں کی بنیادی تنخواہوں میں 250 فیصد اضافہ متوقع ہے. پولیس حکام کا کہنا تھا کہ خیبرپختونخوا کو ہارڈ ایریا قرار دینے سے متعلق پہلا خط مارچ 2025 میں وفاقی حکومت کو ارسال کیا گیا تھا خیبرپختونخوا پولیس پہلے بھی دہشت گردی کے خلاف اپنی ذمہ داریوں اور دیگر صوبوں کے مقابلے میں تنخواہوں کے فرق کی بنیاد پر ہارڈ ایریا اسٹیٹس کا مطالبہ کرچکی ہے.