گورنرخیبرپختونخوا سے نیوٹراسیوٹیکل مینوفیکچررز ایسوسی ایشن کے و چیئرمین کی قیادت میں وفد کی ملاقات

اسلام آباد (اُردو پوائنٹ اخبارتازہ ترین - اے پی پی۔ 03 ستمبر2026ء) گورنر خیبرپختونخوا فیصل کریم کنڈی سے نیوٹراسیوٹیکل مینوفیکچررز ایسوسی ایشن آف پاکستان کے بانی و چیئرمین محمد دانش خان کی قیادت میں وفد نے ملاقات کی جس میں پاکستان کی نیوٹراسیوٹیکل صنعت کی ترقی، برآمدی استعداد، سرمایہ کاری کے امکانات اور صنعت کو درپیش مسائل پر تفصیلی تبادلہ خیال کیا گیا۔

گورنر آفس کے مطابق وفد میں ایسوسی ایشن کے سرپرست اعلی طارق محمود ملک، سینئر وائس چیئرمین ارشاد قریشی، وائس چیئرمین فیڈرل افتخار احمد، ایگزیکٹو ممبران نصیر احمد خان، شاہد عالم اور ڈاکٹر عامر شہزاد بلوچ، کنوینر ایکسپورٹ کمیٹی ڈاکٹر شبیر سلیمی اور سی ای او سِن فارما حسین علی خان شامل تھے۔وفد نے گورنر خیبرپختونخوا کو بریفنگ دیتے ہوئے بتایا کہ پاکستان کی نیوٹراسیوٹیکل صنعت نے گزشتہ بارہ برس کے دوران نمایاں ترقی کی ہے اور ملکی معیشت، سرمایہ کاری اور برآمدات کے فروغ میں اس شعبے کا کردار مسلسل بڑھ رہا ہے۔

(جاری ہے)

وفد نے نیوٹراسیوٹیکل مصنوعات کی برآمدات میں موجود رکاوٹوں اور صنعت کو درپیش مختلف مسائل سے بھی آگاہ کیا۔ اس موقع پر بالخصوص افغانستان کی تجارتی منڈی اور تجارتی راستے کی بندش کے باعث پیدا ہونے والی مشکلات پر بھی گفتگو ہوئی، جبکہ ان مسائل کے حل اور نئی بین الاقوامی منڈیوں تک رسائی کے لیے ممکنہ اقدامات اور حکمت عملی پر بھی تبادلہ خیال کیا گیا۔

گورنر خیبرپختونخوا فیصل کریم کنڈی نے نیوٹراسیوٹیکل صنعت کے مسائل اور برآمدی صلاحیت کو سراہتے ہوئے وفد کو اپنے مکمل تعاون اور ہر ممکن معاونت کی یقین دہانی کرائی۔ گورنر نے کہا کہ نیوٹراسیوٹیکل شعبہ پاکستان کی برآمدات، سرمایہ کاری اور معاشی ترقی میں اہم کردار ادا کرنے کی بھرپور صلاحیت رکھتا ہے اور اس شعبے کے جائز مسائل کے حل کے لیے متعلقہ حکام کے ساتھ تعاون کیا جائے گا۔

ملاقات میں اس امر پر اتفاق کیا گیا کہ نیوٹراسیوٹیکل صنعت اور حکومتی اداروں کے درمیان مؤثر رابطہ اور تعاون مزید مضبوط بنایا جائے تاکہ صنعت کو درپیش رکاوٹوں کو دور، برآمدات میں اضافہ اور پاکستان کی نیوٹراسیوٹیکل مصنوعات کو عالمی منڈیوں میں بہتر انداز میں متعارف کرایا جاسکے۔ وفد نے صنعت کے مسائل کے حل اور شعبے کے فروغ کے لیے گورنر خیبرپختونخوا کی جانب سے تعاون کی یقین دہانی کو سراہا۔

واضح رہے کہ "نیٹریشن " اور "فارماسیوٹیکلز" سے ماخوذ اصطلاح نیوٹراسیوٹیکلز سے مراد کھانے کی اشیاء سے حاصل کی جانے والی مصنوعات ہیں جو بنیادی غذائیت سے ہٹ کر صحت کے فوائد فراہم کرتی ہیں۔ ان کو تین اہم اقسام میں تقسیم کیا جا سکتا ہے جن فعال غذائیں، غذائی سپلیمنٹس اور جڑی بوٹیوں کی مصنوعات شامل ہیں۔