پنجاب سوشل سکیورٹی، نادرا اور لوکل گورنمنٹ کے درمیان اہم معاہدہ،صوبائی وزیر لیبر منشاء اللہ بٹ کی سربراہی میں دستخط

سوشل سکیورٹی ہسپتالوں میں ہونے والی پیدائش اور اموات کا ڈیٹا جدید ڈیجیٹل نظام کے ذریعے درج کیا جائے گا

منگل 8 ستمبر 2026 19:45

لاہور (اُردو پوائنٹ اخبارتازہ ترین - این این آئی۔ 08 ستمبر2026ء) پنجاب سوشل سکیورٹی، نادرا اور لوکل گورنمنٹ کے درمیان اہم معاہدے پر دستخط کیے گئے۔ صوبائی وزیر لیبر محمد منشاء اللہ بٹ کی سربراہی میں ہونے والی تقریب میں کمشنر سوشل سکیورٹی ذوالفقار علی کھرل نے پنجاب سوشل سکیورٹی کی جانب سے معاہدے پر دستخط کیے جبکہ ڈائریکٹر جنرل نادرا پنجاب فضہ شاہد اور ڈائریکٹر جنرل لوکل گورنمنٹ بینش فاطمہ نے بھی معاہدے پر دستخط کیے۔

معاہدے کے تحت سوشل سکیورٹی ہسپتالوں میں ہونے والی پیدائش اور اموات کا ڈیٹا جدید ڈیجیٹل نظام کے ذریعے درج کیا جائے گا۔ پیدائش و اموات کی معلومات نادرا کے ڈیجیٹل نظام میں لوکل گورنمنٹ کے طریقہ کار تک پہنچائی جائیں گی جبکہ ڈیجیٹل نظام کے ذریعے پیدائش و اموات کے بروقت اور درست اندراج کو یقینی بنانے میں مدد ملے گی۔

(جاری ہے)

صوبائی وزیر لیبر محمد منشاء اللہ بٹ نے کہا کہ معاہدے سے سوشل سکیورٹی ہسپتالوں میں پیدائش و اموات کے ریکارڈ کو جدید اور مربوط نظام کا حصہ بنایا جائے گا۔

انہوں نے کہا کہ معاہدے کا مقصد پیدائش و اموات کے اندراج کے عمل کو تیز، شفاف اور مؤثر بنانا ہے۔محمد منشاء اللہ بٹ نے کہا کہ وزیراعلیٰ پنجاب مریم نواز شریف کا ڈیجیٹل پنجاب کا وژن صوبے میں جدید اور شفاف نظام کے قیام کی بنیاد ہے۔ سوشل سکیورٹی، نادرا اور لوکل گورنمنٹ کا اشتراک ڈیجیٹل پنجاب کے وژن کی عملی تکمیل کی جانب مثبت پیش رفت ہے۔صوبائی وزیر لیبر نے کہا کہ پیدائش اور اموات کا بروقت و درست اندراج مؤثر منصوبہ بندی اور بہتر عوامی سہولیات کے لیے ناگزیر ہے۔ معاہدے کے ذریعے سوشل سکیورٹی ہسپتالوں میں پیدائش و اموات کا ڈیٹا جدید ڈیجیٹل نظام سے منسلک کیا جائے گا۔ حکومت پنجاب جدید ٹیکنالوجی کے استعمال اور عوامی خدمات کی بہتری کو ترجیح دے رہی ہے۔