Live Updates

کراچی میں غیر اعلانیہ لوڈشیڈنگ سے عوام پریشان، سنی تحریک کا اظہات تشویش

بجلی و گیس کی بلاتعطل فراہمی اور مہنگائی میں حقیقی ریلیف دیا جائے، حکومت عوام دشمن پالیسیوں سے گریز کرے، شاہد غوری

اتوار 13 ستمبر 2026 01:10

کراچی(اُردو پوائنٹ اخبارتازہ ترین - این این آئی۔ 13 ستمبر2026ء) نائب سربراہ پاکستان سنی تحریک محمد شاہد غوری نے کراچی میں غیر اعلانیہ لوڈشیڈنگ پر تشویش کا اظہار کرتے ہوئے کہا ہے کہ بجلی کی طویل بندش سے شدید گرمی میں شہری پریشان ہیں جبکہ کاروباری سرگرمیاں بھی بری طرح متاثر ہورہی ہیں۔انہوں نے کہا کہ ایک طرف پٹرولیم مصنوعات کی قیمتوں میں مسلسل اضافہ کرکے مہنگائی کا بوجھ عوام پر ڈالا جارہا ہے اور دوسری جانب بجلی کی غیر اعلانیہ لوڈشیڈنگ اور گیس کی عدم دستیابی نے شہریوں کی مشکلات میں اضافہ کردیا ہے۔

عوام پہلے ہی مہنگائی، بے روزگاری اور معاشی مشکلات کا شکار ہیں، ایسے میں بنیادی سہولیات کی عدم فراہمی ان کیلئے مزید اذیت کا باعث بن رہی ہے۔شاہد غوری نے کہا کہ کراچی ملک کا معاشی مرکز ہے، یہاں بجلی کی بندش سے صنعت، تجارت، دکانیں اور چھوٹے کاروبار متاثر ہوتے ہیں جس کے ملکی معیشت پر بھی منفی اثرات مرتب ہوتے ہیں۔

(جاری ہے)

عوامی مفاد کو نظرانداز کرکے کیے جانے والے حکومتی فیصلے ملک کو پائیدار معاشی استحکام نہیں دے سکتے۔

انہوں نے کہا کہ حکومت کو عوامی مسائل کو ترجیح دیتے ہوئے فیصلوں میں عوامی ریلیف کو بنیادی اہمیت دینی چاہیے۔ حکومت بیرونی دباؤ یا اشاروں پر عوام دشمن پالیسیوں سے گریز کرے اور پٹرول، بجلی اور گیس کے حوالے سے عوام کو فوری ریلیف فراہم کرے۔نائب سربراہ پاکستان سنی تحریک نے مطالبہ کیا کہ کراچی میں غیر اعلانیہ لوڈشیڈنگ کا فوری خاتمہ، بجلی و گیس کی بلاتعطل فراہمی اور بڑھتی ہوئی مہنگائی سے عوام کو حقیقی ریلیف یقینی بنایا جائے۔ انہوں نے کہا کہ حکومت عملی اقدامات کے ذریعے شہریوں کا اعتماد بحال کرے۔