کراچی میں مختلف پولیس مقابلے، ایک ڈاکو ہلاک، 5 زخمی حالت میں گرفتار

کراچی (اُردو پوائنٹ اخبارتازہ ترین - این این آئی۔ 05 اکتوبر2026ء) شہر کے مختلف علاقوں میں پولیس اور مبینہ ڈاکوؤں کے درمیان ہونے والے متعدد مقابلوں میں ایک ملزم ہلاک جبکہ 5 ملزمان کو زخمی حالت میں گرفتار کرلیا گیا۔ پولیس نے ملزمان کے قبضے سے اسلحہ، گولیاں، نقدی، موبائل فونز اور موٹرسائیکلیں برآمد کرنے کا دعویٰ کیا ہے۔پولیس کے مطابق گلشن معمار تھانے کی حدود احمد گوٹھ میں پولیس اور ڈاکوؤں کے درمیان فائرنگ کا تبادلہ ہوا، جس کے بعد 2 ملزمان عمیر ولد انور اور ابراہیم ولد فضل الرحمان کو زخمی حالت میں گرفتار کرلیا گیا۔

گرفتار ملزمان کے قبضے سے 2 پستول، گولیاں، موبائل فونز، نقدی اور موٹرسائیکل برآمد ہوئی۔ زخمی ملزمان کو طبی امداد کیلئے اسپتال منتقل کرکے مزید تفتیش شروع کردی گئی۔

(جاری ہے)

گلبرگ پولیس نے ایف بی ایریا بلاک 12 میں ندی کنارے ماما ہوٹل کے قریب مبینہ مقابلے میں اسلم ولد گل محمد کو زخمی حالت میں گرفتار کرلیا۔ پولیس کے مطابق دوران پٹرولنگ مشکوک شخص کو روکنے کی کوشش کی گئی تو اس نے فائرنگ کردی، جس پر پولیس کی جوابی فائرنگ سے ملزم زخمی ہوگیا۔

پولیس کے مطابق گرفتار ملزم سے بغیر نمبر کا 9 ایم ایم پستول، میگزین اور 2 زندہ راؤنڈز برآمد ہوئے جبکہ ملزم کا سابقہ مجرمانہ ریکارڈ چیک کیا جارہا ہے۔حیدری مارکیٹ پولیس نے کوثر نیازی کالونی بلاک ایچ نارتھ ناظم آباد کے قریب مبینہ مقابلے میں محمد سہیل ولد محمد اکبر کو زخمی حالت میں گرفتار کرلیا۔ پولیس کے مطابق فائرنگ کے بعد ملزم کا ایک ساتھی فرار ہوگیا۔

پولیس نے بتایا کہ گرفتار ملزم کے قبضے سے 30 بور پستول، راؤنڈز، نقدی اور مبینہ طور پر چھینا گیا برگنڈی رنگ کا سام سنگ گلیکسی موبائل فون برآمد کیا گیا، جبکہ فرار ملزم کی گرفتاری کیلئے سرچ آپریشن جاری ہے۔ادھر شاہین فورس جمشید ڈویڑن اور فیروز آباد پولیس نے شہید ملت روڈ کے قریب گھر میں ڈکیتی کی اطلاع پر کارروائی کی۔ پولیس کے مطابق موقع پر پہنچنے پر ملزمان نے فائرنگ کردی، دوطرفہ فائرنگ کے نتیجے میں ایک ڈاکو شدید زخمی حالت میں گرفتار کرلیا گیا جبکہ اس کے 3 ساتھی اندھیرے کا فائدہ اٹھاتے ہوئے فرار ہوگئے۔

پولیس کے مطابق گرفتار ملزم سے اسلحہ بھی برآمد ہوا جبکہ فرار ملزمان کی گرفتاری کیلئے تلاش جاری ہے۔دوسری جانب ایس آئی یو اور سی آئی اے کراچی نے انتہائی مطلوب بھتہ خور صمد کاٹھیاواڑی کے اہم کارندے کی صالح محمد گوٹھ، تھانہ شاہ لطیف کی حدود میں موجودگی کی اطلاع پر کارروائی کی۔ترجمان کے مطابق کارروائی کے دوران پولیس اور ملزمان کے درمیان فائرنگ کا تبادلہ ہوا، جس میں ایک ملزم زخمی ہوا اور بعدازاں زخموں کی تاب نہ لاتے ہوئے دم توڑ گیا۔پولیس کے مطابق ہلاک ملزم کے قبضے سے پستول اور راؤنڈز برآمد ہوئے جبکہ اس کی شناخت اور مزید قانونی کارروائی کا عمل جاری ہے۔