Gurdon Ke Masail Aur Alamaat - Article No. 2497

گردوں کے مسائل اور امراض بلڈ پریشر کی طرح ”خاموش قاتل“ میں شمار ہوتے ہیں،یعنی ان کی کوئی واضح علامات نظر نہیں آتیں۔بعض مریضوں میں تھکن کا احساس زیادہ ہوتا ہے،جو ظاہر ہے کہ ایک عام علامت ہوتی ہے۔بعض میں پیر اور چہرے پر سُوجن آ جاتی ہے،بلڈ پریشر بڑھ جاتا ہے،سر میں درد اور چکر کی شکایت ہوتی ہے۔اس کے علاوہ گدلے رنگ کا پیشاب آ سکتا ہے،جس میں خون بھی شامل ہو سکتا ہے۔
ویسے یہ حقیقت ہے کہ گردے کے اکثر مریضوں کو اپنے مرض کا علم ہی نہیں ہوتا۔اس کی بہترین تدبیر معالج سے باقاعدہ رجوع رہنا ہے،یعنی کم از کم تھرپارکر جیسے خشک اور گرم علاقوں کے رہنے والوں کو ہر برس چیک اپ کراتے رہنا چاہیے،بشرطے کہ ان کے حالات اس کی اجازت دیں۔اگر آپ کا بلڈ پریشر نارمل ہو،شکر اور لحمیہ (پروٹین) بھی پیشاب میں شامل نہ ہو تو پھر گردے کے مرض کا امکان نہیں ہوتا۔

(جاری ہے)

معمولی تکلیف کی صورت میں بھی علاج کا بروقت شروع ہونا ضروری ہوتا ہے،اس طرح پیچیدگیاں پیدا نہیں ہوتیں۔
نشاستے دار غذاؤں کی کثرت سے ذیابیطس کے ہونے کا خطرہ رہتا ہے،اس لئے چیک اپ سے اس مرض کا کھوج بھی لگ سکتا ہے اور پھر اس کا علاج اور تدبیر کی ضرورت بھی ہوتی ہے،جس میں غذائی احتیاط کی بڑی اہمیت ہوتی ہے،نشاستے دار اشیاء کی مقدار کم کرنی پڑتی ہے۔صحت مند افراد کی غذا میں نشاستے دار اشیاء کی زیادہ مقدار سے نقصان کا امکان نہیں ہوتا۔جو افراد ریگستانی علاقے (جیسے تھرپارکر،مٹھی وغیرہ) میں رہتے ہیں،صاف پانی کا زیادہ استعمال اُن کے لئے بہت ضروری ہوتا ہے۔صاف پانی گردوں کا سب سے اچھا دوست ہے۔زیادہ پانی پینے سے گردوں اور مثانے میں پتھری کے بننے کا خطرہ نہیں رہتا۔روزانہ کی غذاؤں میں کھیرا،ککڑی،کچری،پھوٹ،کلتھی (اس کے دانے السی سے مشابہ ہوتے ہیں) شامل رکھنا چاہیے۔ان غذاؤں کے کھانے سے گردوں میں پتھری نہیں بنتی،بلکہ خارج ہو جاتی ہے۔یہی وجہ ہے کہ ان مفید غذاؤں میں سے کلتھی کو طب کی ادویہ میں کثرت سے استعمال کیا جاتا ہے۔اسے فارسی میں سنگ شکن کہتے ہیں۔اس کی دال بھی پکا کر گردوں کے مریض کو کھلاتے ہیں۔یہ دال موٹاپے کو بھی کم کرتی ہے۔یہ انگریزی میں ہارس گرام کہلاتی ہے۔