ڈگری کالج پشین کے طلبا نے چمن میں ایک دن ایف سی بلوچستان کے ساتھ گزارا

طلباء کو ایف سی بلوچستان کے تنظیمی ڈھانچے اور دفاعی صلاحیتوں کے بارے میں آگاہ کیا گیا

جمعرات 15 دسمبر 2022 19:50

کوئٹہ(اُردو پوائنٹ اخبارتازہ ترین - این این آئی۔ 15 دسمبر2022ء) ڈگری کالج پشین کے طلباء نے ایک دن ایف سی بلوچستان (نارتھ) کے ساتھ گزارا۔ اس دورے میں طلباء کو ایف سی بلوچستان کے تنظیمی ڈھانچے اور دفاعی صلاحیتوں کے بارے میں آگاہ کیا گیا۔ وفد میں 50 سے زائد طلباء اور فیکلٹی ممبرز شامل تھے۔ اس دورے کا مقصد طلباء میں سکیورٹی امور کے متعلق آگاہی، خود اعتمادی، ایف سی بلوچستان کی دفاعی ذمہ داریوں اور پیشہ وارانہ صلاحیتوں کے بارے میں آگاہی تھا۔

(جاری ہے)

طلباء نے دِن کا آغاز یادگار شہداء پر سلامی اور فاتحہ خوانی سے کیا۔ طلباء وفد نے ملک و قوم کی سلامتی کیلئے پاک فوج اور ایف سی بلوچستان کے آفیسرز اور جوانوں کی قربانیوں کو سراہا اور خراج ِعقیدت پیش کیا۔ وفد کو ایف سی بلوچستان کے جوانوں کی پیشہ وارانہ مہارت ، مستعدی اور سٴْبک رفتاری سے متعلق ایک عملی مظاہرہ اور زیر استعمال اسلحہ و آلات کی مختلف اقسام کے بارے میں ایک مفصل بریفنگ دی گئی۔ اس دوران طلبا کو شیلا باغ ریلوے اسٹیشن اور کھوجک ٹنل کا بھی دورہ کرایا گیا۔ طلباء اور فیکلٹی ممبرز نے اس دورے کو انتہائی مفید قرار دیااور ایف سی بلوچستان کا شکریہ ادا کیا۔