فیصل آباد جیل میں قیدیوں کیلئے مردہ مرغیوں کے گوشت کی سپلائی کا انکشاف

فیصل آباد ( اُردو پوائنٹ اخبارتازہ ترین۔ 04 اگست 2025ء ) صوبہ پنجاب کے شہر فیصل آباد میں جیل میں قیدیوں کیلئے مردہ مرغیوں کے گوشت کی سپلائی کا انکشاف ہوا ہے۔ میڈیا رپورٹس کے مطابق ڈی آئی جی سپیشل برانچ پولیس کی جانب سے محکمہ داخلہ کو بھجوائی جانے والی رپورٹ میں ڈسٹرکٹ جیل فیصل آباد میں مردہ مرغیوں کے گوشت کی سپلائی کا انکشاف سامنے آیا جہاں ڈسٹرکٹ جیل میں 2 ہزار سے زائد قیدیوں کیلئے ہفتے میں 5 دن روزانہ ساڑھے 5 من تک مرغیوں کا گوشت سپلائی کیا جاتا ہے۔

اس ضمن میں بتایا گیا ہے کہ ٹھیکیدار شہباز 2 سے اڑھائی من زندہ مرغیاں گاڑی میں لاتا ہے جس کے کچھ ہی دیر بعد اس کا ملازم مردہ مرغیوں کا 2 سے اڑھائی من گوشت موٹرسائیکل پر نیلے ڈرموں میں مرغیوں کے پروں کے نیچے چھپا کر سلاٹر ہاؤس لاتا ہے جہاں زندہ اور مردہ مرغیوں کا گوشت مکس کرکے تیار کیا جاتا ہے، اس کام میں جیل افسران اور عملہ ٹھیکیدار سے مل کر کرپشن کر رہے ہیں۔

(جاری ہے)

رپورٹ سے معلوم ہوا ہے کہ ایک سٹنگ آپریشن کے ذریعے ٹھیکیدار کے ملازم کو رنگے ہاتھوں پکڑا گیا، جس کے بعد محکمہ داخلہ کو بھجوائی جانے والی ڈی آئی جی سپیشل برانچ پولیس کی رپورٹ کی بنیاد پر 30 جولائی کو جیل سپرنٹنڈنٹ اور ڈپٹی سپرنٹنڈنٹ کو معطل کرنے کے احکامات جاری ہونے تاہم چند ہی گھنٹوں بعد محکمہ داخلہ نے رپورٹ کو مسترد کرتے ہوئے افسران کو دوبارہ بحال کرنے کے احکامات جاری کر دیئے۔

اس حوالے سے ترجمان محکمہ داخلہ پنجاب نے کہا کہ ’جیل میں مردہ مرغی کی سپلائی کی بات میں کوئی صداقت نہیں، اعلیٰ تحقیقاتی ٹیم کے ذریعے معاملے کی مکمل انکوائری کروا لی ہے، پنجاب بھر کی جیلوں میں حفظانِ صحت کے اصولوں کے مطابق کھانا فراہم کیا جاتا ہے‘، تاہم رپورٹ میں پیش کیے گیے ثبوتوں کی جانچ پڑتال اور تحقیقات کیسے کی گئیں؟، اس بارے میں محکمہ داخلہ کی طرف سے تفصیلات فراہم نہیں کی گئیں۔