کمشنر شہید بینظیرآباد ڈویژن نے زچہ بچہ ہیلتھ کئیر سنٹر نواب شاہ میں بچوں کو پولیو سے بچاؤ کے قطرے پلاکر سات روزہ پولیو مہم کا افتتاح کردیا

حیدرآباد (اُردو پوائنٹ اخبارتازہ ترین - اے پی پی۔ 29 اپریل2024ء) کمشنر شہید بینظیرآباد ڈویژن سید محمد سجاد حیدر نے ڈپٹی کمشنر شہید بینظیرآباد شہریار گل میمن اور ڈسٹرکٹ ہیلتھ آفیسر ڈاکٹر اسداللہ ڈاہری کے ہمراہ زچہ و بچہ ہیلتھ کئیر سنٹر نواب شاہ میں بچوں کو پولیو سے بچاؤ کے قطرے پلاکر 29 اپریل سے شروع ہونے والی سات روزہ انسداد پولیو مہم کا افتتاح کیا۔

اس موقع پر کمشنر سید محمد سجاد حیدر نے کہا کہ پولیو سے بچاؤ کے قطرے صرف ایک دوا نہیں بلکہ محفوظ مستقبل کی ضمانت ہیں اس لیے والدین پولیو ٹیموں سے تعاون کرتے ہوئے اپنے بچوں کو پولیو سےبچاؤ کے قطرے پلاکر زندگی بھر کی معذوری سے بچائیں۔ کمشنر نے محکمہ صحت کے افسران کو ہدایات دیتے ہوئے کہا کہ وہ انسداد پولیو مہم کے دوران مقرر کردہ احداف کے حصول اور بچوں کو پولیو سے بچاؤ کے قطرے پلانے والی ٹیموں کی نگرانی کو یقینی بنائیں۔

(جاری ہے)

انہوں نے مزید کہا کہ صوبے میں پولیو وائرس کے پیش نظر اس مہم کو موثر بنانے کے لئے تمام وسائل بروئے کار لائے جائیں۔ انہوں نے مزید کہا کہ وہ خود بھی پولیو ٹیموں کی نگرانی کریں گے ،اس ضمن میں کوتاہی برتنے والے افسران و عملے کے خلاف قانونی کارروائی کی جائے گی۔ اس موقع پر ڈسٹرکٹ ہیلتھ آفیسر ڈاکٹر اسداللہ ڈاہری نے کمشنر کو انسداد پولیو مہم کو کامیاب بنانے کے لئےکئے گئے انتظامات کے متعلق تفصیلی آگاہی دی۔

اس موقع پر ایڈیشنل ڈسٹرکٹ ہیلتھ آفیسر ڈاکٹر عمر جمالی، ڈاکٹر ریاض شاہ، اسسٹنٹ کمشنر نواب شاہ اقبال احمد تنیو، ڈاکٹر اللہ بخش راجپر، ڈاکٹر امینہ بروہی اور دیگر متعلقہ افسران موجود تھے ۔بعد ازاں کمشنر سید محمد سجاد حیدر نے ڈپٹی کمشنر شہریار گل میمن اور ڈسٹرکٹ ہیلتھ آفیسر ڈاکٹر اسداللہ ڈاہری کے ہمراہ نواب شاہ کی مختلف پولیو ٹرانزٹ پوائنٹس کا دورہ کرکے پولیو ٹیموں کے کام کا جائزہ لیا ۔