وفاقی وزیر برائے اقتصادی امور احد خان چیمہ سے برطانوی ہائی کمیشن کی ڈویلپمنٹ ڈائریکٹر جو موئیر کی ملاقات

اسلام آباد (اُردو پوائنٹ اخبارتازہ ترین - اے پی پی۔ 30 اپریل2024ء) وفاقی وزیر برائے اقتصادی امور احد خان چیمہ سے پاکستان میں برطانوی ہائی کمیشن کی ڈویلپمنٹ ڈائریکٹر جو موئیر نے ملاقات کی ہے ۔ منگل کو وزارت اقتصادی امور سے جاری بیان کے مطابق ملاقات کے دوران فارن کامن ویلتھ ڈویلپمنٹ آفس کے ٹیم لیڈر رضوان اعظم اور وزارت اقتصادی امور کے سینئر حکام بھی موجود تھے۔

وزیر اقتصادی امور نے پاکستان میں برطانوی ہائی کمیشن کے ڈویلپمنٹ ڈائریکٹر کا پاکستانی عوام کو فراہم کی جانے والی مسلسل حمایت اور مدد پر شکریہ ادا کیا۔ انہوں نے خاص طور پر 2022 کے سیلاب کے دوران اہم امداد فراہم کرنے میں ایف سی ڈی او کے کردار اور انٹرنیشنل پارٹنرز سپورٹ گروپ کے لیے ان کی حمایت کا اعتراف کیا۔

(جاری ہے)

وفاقی وزیر نے پاکستان کی سماجی و اقتصادی ترقی کے لیے ایف سی ڈی او کے ساتھ جاری تعاون کے لیے حکومت پاکستان کے عزم کا اعادہ کیا۔

ترقیاتی ڈائریکٹر نے غربت میں کمی، موسمیاتی تبدیلی، مالیاتی آلات، اور مالیاتی نظام اور احتساب جیسے مسائل سے نمٹنے کے لیے مضبوط شراکت داری اور باہمی تعاون کی کوششوں پر وزیر کا شکریہ ادا کیا۔ انہوں نے ان اہم شعبوں میں حکومت پاکستان اور ایف سی ڈی او کے مابین تعاون کو مزید فروغ دینے پر اتفاق کیا اور موسمیاتی تبدیلی سے نمٹنے اور وزارت اقتصادی امور کے ساتھ مل کر سماجی شعبے کے اقدامات کی حمایت کرنے کے لیے جدید گرین فنانسنگ آلات کی دریافت میں اپنے مکمل تعاون کی یقین دہانی کرائی۔

ملاقات کے دوران فاقی وزیر احد چیمہ نے قومی ترقی کے اہداف کے حصول کے لیے ایک اچھی تربیت یافتہ افرادی قوت کی اہمیت کو اجاگر کرتے ہوئے، پاکستان کی بیوروکریسی کی کارکردگی اور استعداد کو بہتر بنانے کے لیے حکمت عملیوں پر تبادلہ خیال کیا۔ انہوں نے پاکستان کے بیوروکریٹک نظام کی صلاحیت کو بڑھانے کے لیے برطانیہ کی بیوروکریسی پر مبنی تربیتی پروگراموں کے بہترین نئے مواقعے تلاش کرنے کی تجویز پیش کی۔

ڈویلپمنٹ ڈائریکٹر نے اس تجویز کا خیرمقدم کرتے ہوئے اس اقدام کی حمایت کے بارے میں مکمل آمادگی کااظہار کیا۔ انہوں نے ان شعبوں کا بھی بالخصوص ذکر کیا جہاں پبلک ایڈمنسٹریشن میں برطانیہ کی مہارت کو پاکستان کے بیوروکریٹک نظام کی صلاحیت کو مضبوط بنانے کے لیے استعمال کیا جا سکتا ہے۔ملاقات کے اختتام میں وفاقی وزیر نے معزز مہمان اور ان کے وفدکا شکریہ ادا کیا اور بالخصوص موسمیاتی فنانس، آفات کے خاتمے، اور سیلاب کی بحالی اور تعمیر نو میں مالی امداد میں اضافے کی ضرورت پر زور دیا۔ انہوں نے پاکستان میں سماجی و اقتصادی ترقی کے فروغ کے لیے بجٹ سے باہر کے منصوبوں کی بہتر نمائش اور ایف سی ڈی او کے منصوبوں اور قومی ترقی کے مقاصد کے مابین صف بندی کی اہمیت کو بھی اجاگر کیا۔