پاکستان اور ترکیہ کا دفاع سمیت دیگر شعبوں میں تعاون جاری رکھنے پر اتفاق

اسلام آباد ( اُردو پوائنٹ اخبارتازہ ترین۔ 20 مئی 2024ء ) پاکستان اور ترکیہ نے دفاع سمیت دیگر شعبوں میں تعاون جاری رکھنے پر اتفاق کیا ہے۔ تفصیلات کے مطابق اسلام آباد میں ترک وزیر خارجہ حاقان فدان نے نائب وزیراعظم اور وزیر خارجہ اسحاق ڈار سے ملاقات کی، جس کے بعد دونوں رہنماؤں نے مشترکہ پریس کانفرنس بھی کی۔ اس موقع پر اسحاق ڈار نے کہا کہ دونوں ممالک میں دفاع اور تجارت سمیت دیگرشعبوں میں تعاون جارہی گا، دونوں ملکوں کےعوام کے ایک دوسرے سے مضبوط تعلقات ہیں، پاکستان اورترکیہ دو ملک ایک قوم ہیں، پاکستان اورترکیہ کے درمیان دوطرفہ تاریخی برادرانہ تعلقات ہیں، دونوں ملکوں کی قیادت ہمیشہ عوام کے مفاد میں کام کرتی رہی ہے، دونوں ممالک میں تجارت سمیت دیگرشعبوں میں تعاون موجود ہے، دفاع کےمختلف مشترکہ شعبوں میں تعاون جاری ہے۔

(جاری ہے)

انہوں نے کہا کہ آج کی ملاقات میں پاکستان اور ترکیہ نے دوطرفہ تعلقات پر تعاون بڑھانے پر غورہوا، پاکستان اور ترکیہ کے درمیان دفاعی، سرمایہ کاری اور تجارتی دو طرفہ تعلقات بڑھانے کا اعادہ کیا گیا، ہم نے پاکستان اور ترکیہ کے درمیان جاری معاشی اور اسٹریٹیجک تعاون کا بھی جائزہ لیا، آزاد فلسطین کے قیام تک مشرق وسطیٰ میں امن قائم نہیں ہو سکتا، ترکیہ کے ممنون ہیں انہوں نے کشمیر پر بھارتی غیر قانونی قبضے کے لیے آواز اٹھائی۔

مشترکہ پریس کانفرنس سے خطاب میں ترک وزیرخارجہ حاقان فدان نے ہیلی کاپٹر حادثے میں ایرانی صدر کے انتقال پر افسوس اظہار کرتے ہوئے کہا کہ دکھ کی اس گھڑی میں ہم ایرانی عوام اور حکومت کےساتھ ہیں، ایران میں حادثے کا سنتے ہی ترکیہ نے ہنگامی مدد کی، ایرانی صدر، وزیرِ خارجہ کی وفات پر ایران سے افسوس کا اظہار کرتا ہوں۔ انہوں نے کہا کہ پاکستان ہمارا دوسرا گھر ہے، پاکستان ہمارا قریب دوست اور برادرملک ہے، پاکستان کایہ میرا پہلا دورہ ہے، پاکستان کا علاقائی اور عالمی سطح پر اہم کردار ہے، پاکستان کی ترکیہ کے لیے اہمیت کچھ مختلف ہے، وزیرِ خارجہ اسحاق ڈار کے ساتھ ملاقات انتہائی مفید رہی، ان کے ساتھ مختلف معاملات پر تفصیلی گفتگو ہوئی، پاکستان ہمارا تزویراتی شراکت دار ہے، ہم نے دوطرفہ تعلقات کے تمام پہلوؤں کا جائزہ لیا، پاکستان کا افغانستان کے ساتھ طویل بارڈر ہے، خطے میں امن قائم ہونا ضروری ہے۔

ترک وزیر خارجہ کا کہنا ہے کہ پاکستان اور ترکیہ کے عوام کے درمیان غیر متزلزل دوستی ہے، ترکیہ دہشت گردی کے خلاف جنگ میں پاکستان کے ساتھ کھڑا ہے، پاکستان کی جغرافیہ کی وجہ سے اسٹریٹیجک اہمیت ہے، پاکستان اور ترکیہ خطے کے امن کے لیے اسٹریٹیجک پارٹنرز ہیں، ملاقات میں ہم نے غزہ کی صورت حال پر بھی بات چیت کی، سائنس و ٹیکنالوجی کے شعبے میں بھی تعاون کے مواقع پر بات چیت ہوئی۔