کل رات کو ہم سب نے دیکھا کہ فرسودہ نظام کے بلڈوزر آئے،بیرسٹرگوہر

اسلام آباد(اردو پوائنٹ اخبارتازہ ترین۔24 مئی 2024 ) پاکستان تحریک انصاف کے رہنماءبیرسٹر گوہر کا کہناہے کہ سی ڈی اے کی جانب سے ہمارے اوپر یلغار کی گئی ہے ،کل رات کو ہم سب نے دیکھا کہ فرسودہ نظام کے بلڈوزر آئے،جمہوریت میں پارٹی کے سینٹرل آفس کا تقدس ہوتا ہے،کل کے حملے کامقصد ہمارے راستے میں رکاوٹوں کو کھڑا کرنا تھا۔اسلام آباد میں پارٹی کی کور کمیٹی کے اجلاس کے بعد پارٹی رہنماءعمرایوب اور شبلی فراز کے ہمراہ میڈیا سے گفتگو کرتے ہوئے انہوں نے کہا کہ کور کمیٹی کا اجلاس آج ہم نے باہر سڑک پر منعقد کیا، ہم سی ڈی اے کی کارروائی کی مذمت کرتے ہیں، ہم واضح کرنا چاہتے ہیں ہم پر امن ہیں، ہماری عورتوں کو جیلوں میں ڈالا گیا لیکن ہم پھر بھی مشتعل نہیں ہوئے۔

پی ٹی آئی عمر ایوب نے بتایا کہ اس فرسودہ نظام میں آئین و قانون کی بالادستی نہیں ہے۔

(جاری ہے)

شہباز شریف اور مریم نواز کی حکومت کے خلاف ہماری جدوجہد جاری رہے گی۔ عامر مغل کو رات کو پولیس گردی کا نشانہ بنایا گیا، ایڈووکیٹ علی بخاری اور ہم نے ان کو رات کے 3 بجے بازیاب کروایا۔ اس نظام کے خلاف ہم آخری حد تک لڑیں گے۔جس وقت عمران خان کا آرڈر ہوگا تو اسی وقت سے ہماری تحریک شروع ہوجائے گی، پانی کا ایک قطرہ بھی پہاڑ کو چیر دیتا ہے۔

پی ٹی آئی رہنماءشبلی فراز کا کہنا تھا کہ پاکستان کی قوم اور ایک ایک ورکر کے دل میں عمران خان کی محبت ہے۔ ہم یہ جنگ پہلے ہی جیت چکے ہیں۔ یہ سیاسی طور پر ہمارا مقابلہ نہیں کرسکے تو یہ اب ہمیں شکست دینے کیلئے طاقت کا استعمال کررہے ہیں۔ آئین کی بحالی ہمارا سب سے بڑا سیاسی ٹارگٹ ہے، پاکستان کا تاثر بیرونی دنیا میں انتہائی خراب ہے۔نوازشریف نے ہمیشہ فکس میچ کھیلا ہے، ہمارے نوجوانوں کا مستقبل روشن نہیں لگ رہا ہے۔ہماری خواتین ایک سال سے قید و بند کی صعوبتیں برداشت کررہی ہیں، تمام سختیوں کے باوجود ہم نے پرامن پروقار تشخص برقرار رکھا ہے۔