فواد چوہدری اور ان کے ساتھیوں کو مولانا فضل الرحمن کی اپوزیشن سے خطرہ ہے ،حافظ حسین احمد

جیکب آباد(اُردو پوائنٹ اخبارتازہ ترین - این این آئی۔ 25 مارچ2019ء) جمعیت علمائے اسلام کے مرکزی ترجمان حافظ حسین احمد نے وفاقی وزیر اطلاعات فواد چوہدری کے بیان پر تبصرہ کرتے ہوئے کہا ہے کہ فواد چوہدری اور ان کے ساتھیوں کو مولانا فضل الرحمن کی اپوزیشن سے تکلیف اور خطرہ ہے، مولانا فضل الرحمن اپنے مشن پر ڈٹے ہوئے ہیں فواد چوہدری کب تک تحریک انصاف میں ڈٹے رہتے ہیں اصل بات یہ ہے۔

(جاری ہے)

پیر کے روز صحافیوں سے گفتگو کرتے ہوئے حافظ حسین احمد نے مزیدکہا کہ فواد چوہدری کا مشرف سے عمران تک کا سفر ابھی تک جاری ہے ، کل فواد چوہدری اپنا بیانیہ تبدیل کرکے کسی اور کے ساتھ ہونگے وہ آشیانے بدلنے کے ماہر ہیں موسمی پرندوں کی طرح وہ وقت اور حالات کو دیکھ کر اپنے آشیانے بدلتے ہیں، انہوں نے کہا کہ حکومت کو مولانا فضل الرحمن کی اپوزیشن سے کافی خطرہ ہے انہیں خوف ہے کہ کہی باقی دو بڑی پارٹیاں بھی ان کا حصہ نہ بن جائیں ، مولانا فضل الرحمن اپنے مشن پر ڈٹے ہوئے ہیں اور ڈٹے رہیں گے اب دیکھنا یہ ہے کہ فواد چوہدری کب تک تحریک انصاف میں ڈٹے رہتے ہیں ، انہوں نے کہا کہ کچھ لوگوں کو پارلیمنٹ میں آنے سے روکنے کے لیے انتظام کیا گیا تھا لیکن وہ ان کو مہنگے پڑ رہے ہیں ، پارلیمنٹ کے اندر شاید ان کو اتنا نقصان نہ ہوتا جتنا پارلیمنٹ سے باہر رکھ کر ہورہا ہے، حافظ حسین احمد نے شیخ رشید کے بیان پر تبصرہ کرتے ہوئے کہا کہ ملک میں چوکیدار کی حکومت ہے البتہ پہلے پرانے چور تھے اب اس وقت نئے چور چوکیدار کے ساتھ ہے ۔