منی لانڈرنگ کیس میں انسداد دہشتگردی کی عدالت کی کے کے ایف کے اکاونٹس ایف آئی اے کو تحویل میں لینے کی ہدایت

درخواست پر فیصلہ ملزم کی موجودگی میں سنایا جائے گا، عدالت نے ضمانت سے متعلق درخواست پر فیصلہ 29 اپریل تک موخر کر دیا

ہفتہ 20 اپریل 2019 15:10

ْ کراچی (اُردو پوائنٹ اخبارتازہ ترین - این این آئی۔ 20 اپریل2019ء) منی لانڈرنگ کیس میں انسداد دہشتگردی کی عدالت نے کے کے ایف کے اکاونٹس ایف آئی اے کو تحویل میں لینے کی ہدایت کر دی۔ ہفتہ کو خدمت خلق فاونڈیشن کی اربوں روپے کی جائیدادوں سے متعلق ایف آئی اے کی درخواست پر انسداد دہشتگردی عدالت میں سماعت ہوئی۔ ایف آئی اے کی درخواست پر عدالت نے جائیدادوں کی ضبطگی کا حکم دیدیا۔

(جاری ہے)

ایف آئی اے کی جانب سے درخواست میں موقف اختیار کیا گیا تھا کہ تحقیقات کرنی ہے اکاونٹ تحویل میں لینیکی اجازت دی جائے، بینک اکاونٹس سے کروڑوں روپے منی لانڈرنگ کی گئی ہے جبکہ سابق سینیٹر احمد علی کی ضمانت قبل از گرفتاری کی درخواست پر فیصلہ نہیں سنایا جاسکا۔ملزم کے وکیل نے کہا سابق سینیٹر احمد علی کی طبیعت ناساز ہے اس لیے پیش نہیں ہوسکتے۔ عدالت سے استدعا ہے ضمانت پر فیصلہ موخر کیا جائے۔ عدالت نے ریمارکس دئیے کہ درخواست پر فیصلہ ملزم کی موجودگی میں سنایا جائے گا، عدالت نے ضمانت سے متعلق درخواست پر فیصلہ 29 اپریل تک موخر کر دیا۔