یو بی جی رہنمائوں کا 2 بلین ڈالر سے زائدکی ریکارڈ آئی ٹی برآمدات کا خیرمقدم

آئی ٹی معاشی انقلاب سے نوجوان نسل کا روشن مستقبل منسلک ہے ،ایس ایم منیر،افتخار علی ملک،زبیرطفیل

ہفتہ 31 جولائی 2021 19:17

کراچی (اُردو پوائنٹ اخبارتازہ ترین - این این آئی۔ 31 جولائی2021ء) یونائٹیڈ بزنس گروپ( یو بی جی) کے سرپرست اعلی ایس ایم منیر، چیئرمین افتخار ملک، صدر زبیر طفیل اور ایف پی سی سی آئی کی ایگزیکٹو کمیٹی میں یو بی جی کے دیگر رہنماؤں اور ممبران نے وزیر اعظم کے مشیر تجارت عبدالرزاق داؤد کو آئی ٹی ایکسپورٹ کو ملکی تاریخ میں پہلی بار 2 بلین ڈالر سے تجاوز کرنے پر مبارکباد پیش کی ہے۔

(جاری ہے)

یو بی جی رہنمائوں کا کہنا تھا کہ اس کامیابی نے بین الاقوامی مارکیٹ میں پاکستان کے سافٹ امیج کو بہتر کیا ہے جس سے مستقبل میں مزید اضافہ کی توقع ہے۔ یو بی جی کی قیادت نے بجٹ میں ٹیکسوں اور طریقہ کار میں حکومت کی جانب سے پیش کردہ مختلف مراعات کا بھی خیر مقدم کیا کہ جس کے نتیجے میں آئی ٹی برآمدات کی حوصلہ افزائی ہوئی، خاص طور پر برآمدات کے لحاظ سے جو گزشتہ سال 1.44 بلین امریکی ڈالر کی سطح پر ریکارڈ کی گئی تھی۔یو بی جی ممبران کا کہنا تھا کہ آئی ٹی معاشی انقلاب لا سکتی ہے جس سے نوجوان نسل کا روشن مستقبل منسلک ہے اور آئی ٹی کی اہمیت سے خاص طور پر کوویڈ کی وبائی مرض کے دوران اس میں موجود مواقع کا اندازہ لگایا جا چکا ہے۔