متحدہ عرب امارات کی کمپنی کی سندھ میں کچ فولاد نکالنے کے منصوبے میں دلچسپی

وزیر برائے معدنیات و معدنی ترقی اور وزیرِ اعلی سندھ کے معاون خصوصی برائے سرمایہ کاری کی مشترکہ صدارت میں اہم اجلاس،تھر اور جھمپیر میں کچ فولادنکالنے، ریفائن کرنے اور پیلٹائزنگ کے منصوبے پر بات چیت

جمعرات 21 اکتوبر 2021 18:44

کرا چی(اُردو پوائنٹ اخبارتازہ ترین - این این آئی۔ 21 اکتوبر2021ء) سندھ کے ضلع تھر اور ضلع ٹھٹھہ میں جھمپیر میں موجود کچ فولاد (Iron ore) کے زخائر کو نکالنے ، ریفائن کرنے اور پیلٹائزنگ کرنے میں دلچسپی رکھنے والی متحدہ عرب امارات کی کمپنی کے مجوزہ منصوبے کے بارے میں بات چیت کے لئے ایک اہم اجلاس آج محکمہ سرمایہ کاری سندھ کے دفتر میں سندھ کے وزیرِ معدنیات و معدنی ترقی میر شبیر علی بجارانی اور وزیرِ اعلی سندھ کے معاون خصوصی برائے سرمایہ کاری اور پبلک پرائیویٹ پارٹنر شپ قاسم نوید قمر کی مشترکہ صدارت میں منعقد ہوا۔

اجلاس میں سیکریٹری معدنیات و معدنی ترقی سندھ سید ذوالفقار علی شاہ ،سندھ کے پبلک پرائیویٹ پارٹنر شپ سیل کے سربراہ خالد شیخ اور دیگر افسران نے شرکت کی۔

(جاری ہے)

اجلاس میں متحدہ عرب امارات کی کمپنی گولڈ آپشن (Gold Option) کے نمائندوں نے تھر اور ٹھٹھہ میں کچ فولاد نکالنے اور اس ضمن میں سندھ میں صنعت لگانے میں گہری دلچسپی کا اظہار کیا اور اپنے مجوزہ منصوبے کی تفصیلات سے آگاہ کیا۔

اس موقع پر میر شبیر علی بجارانی اور قاسم نوید قمر نے اماراتی کمپنی کو اپنے تعاون کا یقین دلاتے ہوئے کہا کہ سندھ حکومت صوبے میں سرمایہ کاری کے منصوبوں کو فروغ دینے اور نئے پراجیکٹس میں دلچسپی رکھنے والی کمپنیوں کی بھرپور حوصلہ افزائی کررہی ہے۔ انہوں نے کہا کہ اماراتی کمپنی کے مجوزہ منصوبے پر عملدرآمد سے تھر اور ٹھٹھہ میں روزگار اور معاشی و معاشرتی ترقی کے مواقع پیدا ہوں گے۔انہوں نے اماراتی کمپنی سے مکمل منصوبے کی تفصیلات پیش کرنے اور اس ضمن میں کام کو تیزی سے آگے بڑھانے پر کی ضرورت پر زور دیا۔اماراتی کمپنی کے نمائندوں نے کہا کہ وہ آئندہ ماہ منصوبے کی مکمل تفصیلات سندھ حکومت کو پیش کریں گے۔

کراچی شہر میں شائع ہونے والی مزید خبریں:

Your Thoughts and Comments