صوبائی وزیر معدنیات سردار شیر علی گورچانی کی زیر صدارت آل پاکستان مائن اونرز ایسوسی ایشن کے عہدے داران کا اجلاس

لاہور(اُردو پوائنٹ اخبارتازہ ترین - این این آئی۔ 22 مئی2024ء) صوبائی وزیر معدنیات سردار شیر علی گورچانی کی زیر صدارت آل پاکستان مائن اونرز ایسوسی ایشن کے عہدے داران کا اہم اجلاس منعقد ہوا۔ اجلاس میں ایسوسی ایشن کے عہدے داران نے فیلڈ میں پیش آنے والے مختلف مسائل پر وزیر معدنیات کو تفصیلی بریفنگ دی۔ملاقات کے دوران آل پاکستان مائن اونرز ایسوسی ایشن نے کول مائننگ کے پیچیدہ عمل اور اس سے جڑے تکنیکی مسائل پر روشنی ڈالی۔

انہوں نے وزیر معدنیات کو ڈیڈ رینٹ اور مائننگ لیز کے وقت اور دورانیہ سے متعلق مشکلات سے آگاہ کیا۔وزیر معدنیات سردار شیر علی گورچانی نے یقین دہانی کرائی کہ کانکنی کے شعبے کو مائن اونرز ایسوسی ایشن کی مدد سے ترقی دی جائے گی۔ ان کا کہنا تھا کہ کانکنی معاشی ترقی میں بیک بون کا کردار ادا کرتی ہے اور حکومت مائن اونرز کی تمام مشکلات کو حل کرنے کے لئے عملی اقدامات کرے گی۔

(جاری ہے)

مزید براں، وزیر معدنیات نے مائن اونرز ایسوسی ایشن کے تعاون سے کانکنی کے شعبے کو جدید خطوط پر استوار کرنے کا عزم ظاہر کیا۔ انہوں نے کہا کہ حکومت کانکنی کے شعبے کو آگے بڑھانے کے لئے نئے منصوبے متعارف کروائے گی تاکہ یہ شعبہ ملکی معیشت میں مزید بہتری لا سکے۔آل پاکستان مائن اونرز ایسوسی ایشن نے اس یقین دہانی پر وزیر معدنیات کا شکریہ ادا کیا اور امید ظاہر کی کہ حکومت کی جانب سے مزید سپورٹ ملنے سے کول مائننگ کے شعبے میں درپیش مشکلات کا خاتمہ ہو گا۔