پی آئی ٹی بی کے ای ٹکٹنگ نظام کے تحت نیشنل ہائی ویز اینڈ موٹر ویز پولیس کی تیز رفتاری پر چالان کی مد میں ساڑھے سات ارب روپے کی وصولی

آئی جی موٹرویز کی قومی شاہراہوں کے مانیٹرنگ نظام کیلئے پی آئی ٹی بی سے تعاون میں دلچسپی ‘آئی جی موٹرویز عامر ذوالفقار خان کی چیئرمین پی آئی ٹی بی ڈاکٹر عمر سیف سے ملاقات

منگل 17 جولائی 2018 18:58

لاہور (اُردو پوائنٹ اخبارتازہ ترین - این این آئی۔ 17 جولائی2018ء) آئی جی موٹرویز اینڈ نیشنل ہائی ویز عامر ذوالفقار خان نے وفد کے ہمراہ گزشتہ روز پنجاب انفارمیشن ٹیکنالوجی بورڈ کے چیئرمین ڈاکٹر عمر سیف سے ملاقات کی۔ اس موقع پر آئی جی عامر ذوالفقار نے نیشنل ہائی ویز اور موٹروے پولیس کے ہیومین ریسورس مینجمنٹ سسٹم سمیت مکمل نظام کو خودکار بنانے‘ سمارٹ ایپلی کیشنز کے ذریعے پٹرولنگ افسران کی کارکردگی میں بہتری‘ نگرانی کیلئے جدید کنٹرول روم کے قیام‘ویڈیو کیمروں کو مرکزی نظام سے منسلک کرنے‘ مسافروں کیلئے فوری ایمرجنسی سروسز اور موٹر وے پولیس اور اینٹی کار لفٹنگ یونٹ کے درمیان باہمی تعلق کا نظام بنانے میں دلچسپی ظاہر کی ۔

ڈاکٹر عمر سیف نے آئی جی موٹر ویز کو یقین دلایا کہ پی آئی ٹی بی کی ٹیم موٹر وے اینڈ ہائی وے پولیس کے مختلف شعبوں کو آئی ٹی پر مبنی ہر ممکن خدمات فراہم کرے گی جن سے موٹروے پولیس کو نگرانی کے نظام کو مزید موثر اور فعال بنانے میں مدد ملے گی۔

(جاری ہے)

ملاقات کے دوران بتایا گیا کہ پی آئی ٹی بی کے وضع کردہ ای ٹکٹنگ نظام کے تحت نیشنل ہائی ویز اینڈ موٹر ویز پولیس اب تک پورے ملک میں تیز رفتاری پر چالان کی مد میں ساڑھے سات ارب روپے وصول کر چکی ہے۔پی آئی ٹی بی نیشنل ہائی ویز اور موٹر وے کے افسران اور سٹاف کو سافٹ ویئر کے استعمال کی تربیت بھی دے گا۔