وزیر اعظم پاکستان کی ہدایت پرپنجاب فوڈ اتھارٹی کا ناقص دودھ کے خلاف کریک ڈاون

لاہور(اُردو پوائنٹ اخبارتازہ ترین - این این آئی۔ 22 فروری2019ء) وزیر اعظم پاکستان کی ہدایت پرپنجاب فوڈ اتھارٹی نے علی الصبح ناقص دودھ کے خلاف صوبہ بھر میں کریک ڈاون کیا۔ڈی جی فوڈ اتھارٹی کی سربراہی میںپنجاب بھر میں1635گاڑیوں میں لائے جانے والی2لاکھ چالیس ہزار 725 لیٹر دودھ کی چیکنگ کے دوران 118گاڑیوں میں موجود 28ہزار 857 لیٹر ناقص دودھ موقع پر ضائع کر دیا گیا۔

دودھ کی مقدار اور گاڑھا پن بڑھانے کیلئے مضر صحت کیمیکلز، پاؤڈر اور پانی کی ملاوٹ پائی گئی۔تفصیلات کے مطابق وزیر اعظم پاکستان عمران خان کی ہدایت پرپنجاب فوڈ اتھارٹی نے ناقص دودھ کے خلاف کریک ڈاون کیا۔ڈی جی فوڈ اتھارٹی کیپٹن (ر) محمد عثمان کی سربراہی میں صوبہ بھر میں شہروں کے داخلی و خارجی راستوں پر علی الصبح ناکے لگا ئے گئے۔

(جاری ہے)

1635گاڑیوں میں لائے جانے والی2لاکھ چالیس ہزار 725 لیٹر دودھ کے موقع پر ٹیسٹ کیے گئے۔

118گاڑیوں میں موجود 28ہزار 857 لیٹر ناقص دودھ موقع پرضائع کر دیا گیا۔ لاہور زون کے تمام اضلاع میں 855گاڑیوں کی چیکنگ کرتے ہوئے 64کا 4ہزار 187لیٹرفیل شدہ دودھ ضائع کیا گیا۔ نارتھ زون کی 40گاڑیو ں میں24ہزار140 جبکہ ساوتھ زون کی 14گاڑیوں میں 530لیٹر ناقص دودھ پایا گیا۔ شہر لاہور میں داخل ہونے والی 225 گاڑیوں کی چیکنگ کے دوران ایک ہزار510 لیٹر دودھ ناقص دودھ پایا گیا۔

ڈی جی فوڈ اتھارٹی کا کہنا تھا کہ دودھ کی مقدار اور گاڑھا پن بڑھانے کیلئے مضر صحت کیمیکلز، پاؤڈر اور پانی کی ملاوٹ پائی گئی۔محفوظ دودھ کی یقینی فراہمی کے لیے لازمی پاسچرائزیشن کے قانون کو لاگو کرنے پر کام کر رہے ہیں۔ کیپٹن (ر) محمد عثمان کا مزید کہنا تھا کہ وزیر اعظم پاکستان عمران خان نے گزشتہ روز کابینہ اجلاس میں ناقص دودھ کے خلاف ملک گیر کریک ڈاون کا حکم دیا تھا۔

اس حوالے سے انہوں نے 12جنوری کو پنجاب فوڈ اتھارٹی پاسچرائزیشن قانون پر پیش رفت کے حوالے سے تفصیلی بریفنگ بھی لی تھی۔ ملاوٹ کے خاتمے کیلئے کھلے دودھ پر پابندی اور پاسچرائزیشن قانون پر عملی اقدامات کے لیے وزیر اعظم پاکستان نے کمیٹی تشکیل دی تھی۔ یاد رہے پنجاب فوڈ اتھارٹی2022کی ڈیڈ لائن تک پاسچرائزیشن قانون کامیابی سے لاگو کرنے کے لیے موثر اور تیز ترین اقدامات کر رہی ہے۔وزیر اعظم پاکستان کے ویژن کے مطابق عوام کو خالص اور معیاری دودھ کی یقینی فراہمی کے لیے ہر ممکن اقدامات اٹھا ئے جارہے ہیں۔