پاکستان میں کھیلوں کا بہت ٹیلنٹ ہے‘ مناسب اقدامات کر کے ملک میں بہترین ایتھلیٹس پیدا کئے جاسکتے ہیں‘ اتھلیٹ محمد انعام بٹ

لاہور۔21 اکتوبر(اُردو پوائنٹ اخبارتازہ ترین - اے پی پی۔ 22 اکتوبر2019ء) قطر میں ورلڈ بیچ گیمز میں سونے کا تمغہ جیتنے والے قومی ہیرو محمد انعام بٹ نے کہا ہے کہ میرے لئے انتہائی فخرکا باعث ہے کہ میں وطن کی سربلندی کا باعث بناہوں، اس کامیابی پر اپنے والدین، اساتذہ اور ان تمام افراد کا مشکورہوں جنھوںنے مجھے سپورٹ کیا اور میری حوصلہ افزائی کی اور خاص طورپر میڈیاکابھرپورساتھ دینے پر مشکورہوں‘ میڈیاکے توسط سے حکام کی توجہ اس جانب مبذول کراناچاہتاہوںکہ پاکستان میں کھیلوں کا بہت ٹیلنٹ ہے، اگر حکومتی سطح پر اقدامات کئے جائیں تو مقامی ایتھلیٹس ملک کانام روشن کر سکتے ہیں ، 2018 میں اسلام آبادمیں انٹرنیشنل ریسلنگ مقابلے کرائے جس میں 20 سے زائد ممالک کے نامور ریسلرزنے شرکت کی‘ بہت جلد لاہور میں میگا ریسلنگ ایونٹ منعقد کیاجارہا ہے جس میں دنیابھر کے ورلڈچیمپئن ریسلرزشرکت کریں گے۔

(جاری ہے)

ان خیالات کا اظہار انہوں نے لاہور پریس کلب کے پروگرام" میٹ دی پریس "میں گفتگو کرتے ہوئے محمد انعام بٹ نے مزید کہاکہ ہم کھیاڑیوںکی صلاحیتوں کے ساتھ ان کی تعلیم پر بھی بھرپورتوجہ دیتے ہیں اور ایسے طلباء کی حوصلہ افزائی کی جاتی ہے جو تعلیم کے ساتھ کھیلوںمیں بھی حصہ لیتے ہیں۔صدر ارشد انصاری نے محمد انعام بٹ کو قومی اثاثہ اور قومی فخر قراردیتے ہوئے کہاکہ انھوںنے ملک کا نام ساری دنیامیں روشن کیاہے، ہمارافرض ہے کہ ایسے ہیروزکا احترام کریں‘یہ لوگ قومی سرمایہ ہیں جن سے ملک کا سافٹ امیج ساری دنیا میں ابھرتا ہے ۔

انہوں نے کہا کہ میڈیا کوملکی سطح پر بڑھ چڑھ کر ان ہیروزکی اہمیت کواجاگر کرنا چاہیے تاکہ نوجوانوںمیں ملک کی خاطر کچھ کر گزرنے کا جذبہ فروغ پاسکے۔بعد ازاں صدر پریس کلب نے محمد انعام بٹ کوشاندارکارکردگی پر خراج تحسین پیش کرتے ہوئے لاہور پریس کلب کی جانب سے اعزازی ممبرشپ دینے کا بھی اعلان کیا۔