مونا با،تھر پارکر ٹرین کی بحالی ریلوے کا مینڈیٹ نہیں، یہ فیصلہ وفاقی حکومت نے کرنا ہے‘ عامر علی بلوچ

لاہور(اُردو پوائنٹ اخبارتازہ ترین - این این آئی۔ 28 مارچ2024ء) پاکستان ریلوے کے چیف ایگزیکٹو آفیسر عامر علی بلوچ نے کہا ہے کہ مونا با،تھر پارکر ٹرین کی بحالی ریلوے کا مینڈیٹ نہیں ہے، یہ فیصلہ وفاقی حکومت نے کرنا ہے،عید پر سپیشل ٹرینوں کے کرایوں میں ڈسکائونٹ پر غور کریں گے، تنخواہوں میں تاخیر کا خاتمہ کر دیا ہے، گریجویٹی اور پنشن کی جلد دائیگی پر بھی توجہ دیں گے، زکریا ایکسپریس میں لگائی جانے والی پریمیم لائونج ڈائننگ کار کو بہت پذیرائی ملی، اسے بہت جلد تیزگام اور ہزارہ ایکسپریس میں بھی لگا رہے ہیں، چھوٹے پلیٹ فارمز کو مرحلہ وار اپ گریڈ کر رہے ہیں، ٹرینوں کی بوگیوں پر ترتیب کے مطابق نمبر لگانے کی ہدایات کر دی ہیں، گرین لائن کے سٹاپس بڑھانے سے لمبی منزل کے مسافر تنگ ہوں گے، گرمیوں میں بعض ٹرینوں کی اے سی سلیپر کوچز میں اضافہ کریں گے۔

(جاری ہے)

ان خیالات کا اظہار فیس بک ای کچہری میں مسافروں کے سوالات اور مسائل سنتے ہوئے کیا۔عامر علی بلوچ نے کہا کہ دیگر ٹرینوں کو گرین لائن کی طرز پر اپ گریڈ کرنے میں وقت لگے گا، کوچز کی اپ گریڈیشن فنڈز کی دستیابی پر منحصر ہے۔ انہوں نے کراچی سرکلر ریلوے بارے سوال کے جواب میں کہا کہ کے سی آر ار سندھ حکومت کا پراجیکٹ ہے، پوری دنیا میں اندرون شہر ریلوے شہری یا صوبائی حکومتیں ہی چلایا کرتی ہیں۔

سو کے سی آر بارے بھی فیصلہ صوبائی حکومت ہی کرے گی۔چیف ایگزیکٹو افسر عامر علی بلوچ نے کہا کہ تجاوزات کے خلاف آپریشن جاری ہے، ہم قبضہ مافیا سے ایک ایک انچ واپس لیں گے۔ غوری ایکسپریس میں نجی سٹاف کے غیر مناسب رویے پر انکوئری کی ہدایت کر دی ہے۔ عامر بلوچ نے کہا کہ فنڈز کی دستیابی پر کوچز میں سی سی ٹی وی کیمرے بھی لگائیں گے۔ انہوں نے کہا کہ مونا با،تھر پارکر ٹرین کی بحالی ریلوے کا مینڈیٹ نہیں ہے، یہ فیصلہ وفاقی حکومت نے کرنا ہے۔

ٹی ایل اے کو مستقل کرنے کا فیصلہ حکومت پاکستان کی پالیسی کے تحت کیا جائے گا۔ انہوں نے مزید کہا کہ رابطہ ایپلیکیشن میں بہتری لا ئی جائے گی اور مسافروں کے رش کے پیشِ نظر عید کے پر مسرت موقع پر وسائل کو مد نظر رکھتے ہوئے بعض ٹرینوں میں ایکسٹرا کوچز بھی لگائیں گے۔ای کچہری میں سات ہزار کمنٹس، سوالات، شکایات اور تجاویز موصول ہوئیں۔