کسی کھلاڑی پر چارج لگا کر پی سی بی کو خوشی نہیں ہوتی،چیف آپریٹنگ آفیسر

اتوار 28 فروری 2021 19:45

لاہور(اُردو پوائنٹ اخبارتازہ ترین - این این آئی۔ 28 فروری2021ء) پاکستان کرکٹ بورڈ کے چیف آپریٹنگ آفیسر سلمان نصیر نے کہا ہے کہ عمر اکمل کے خلاف کیس کوئی نہیں جیتا ہے، پی سی بی یہ کیس جیت کر بھی ہارتا ہے کیونکہ عمر اکمل پاکستانی کھلاڑی ہیں اور کسی بھی کھلاڑی پر چارج لگا کر یا سزا دے کر پی سی بی کو خوشی نہیں ہوتی۔

(جاری ہے)

میڈیا سے گفتگو کرتے ہوئے انہوں نے کہا کہ عمر اکمل پر دو چارج تھے جس بناء پر ان پر 18 ماہ کی پابندی لگائی گئی تھی لیکن ایک کیس آزاد اجیو ڈیکٹر نے ختم کردیا تھا اور 18 ماہ کی پابندی کو برقرار رکھا تھا۔

عالمی ثالثی عدالت نے 18ماہ کو 12ماہ کی سزا میں تبدیل کیا جبکہ 6 ماہ کی سزا کی جگہ انہیں ساڑھے 42 لاکھ روپے کا جرمانہ عائد کیا ، اس طرح پی سی بی نہ کیس جیتا ہے اور نا ہارا ہے کیونکہ جیت میں بھی پی سی بی کی ہار ہوتی ہے۔انہوں نے کہا کہ پاکستانی کھلاڑیوں کو سزا دے کر انہیں اور بورڈ کو خوشی نہیں ہوتی لیکن قوانین قوانین ہوتے ہیں جس کی پاسداری پر عمل لازمی کرنا ہوگا ، اس پر کسی قسم کا سمجھوتہ نہیں کیا جائے گا۔